جەتىسۋ وبلىستىق سوتىندا شەرزات پولاتتىڭ ولىمىنە قاتىستى اتىشۋلى ءىس بويىنشا ۇكىم جاريالانعان ساتتە سوت زالىندا كەزەكتى جانجال ورىن الدى، دەپ حابارلايدى “ادىرنا” ۇلتتىق پورتالى.
20 جىلعا باس بوستاندىعىنان ايىرىلعان راۆيل ساكيەۆتىڭ اناسى ەموتسياسىن ۇستاي الماي، سوت ءتارتىبىن بۇزعانى ءۇشىن اكىمشىلىك جازاعا تارتىلدى.
سوت ۇكىمى وقىلعان كەزدە ساكيەۆتىڭ اناسى ايعايلاپ، جۋرناليستەرگە ءتىل تيگىزىپ، زالدا تارتىپسىزدىك تۋعىزعان. وسى ارەكەتى ءۇشىن سوت وعان ايىپپۇل سالۋ تۋرالى شەشىم شىعاردى.
بۇل وقيعاعا بايلانىستى جەتىسۋ وبلىستىق پوليتسيا دەپارتامەنتى رەسمي مالىمدەمە جاساپ، سوت شەشىمىنە قۇرمەتپەن قاراۋ قاجەتتىگىن ەسكەرتتى.
«پوليتسيا دەپارتامەنتى ادىلدىككە قىسىم كورسەتۋگە جول جوق ەكەنىن جانە سوت شەشىمىنىڭ ورىندالۋىنا كەدەرگى كەلتىرەتىن كەز كەلگەن ارەكەت زاڭ اياسىندا قاتاڭ توقتاتىلاتىنىن مالىمدەيدى. “جازانىڭ ورىندالماۋى مۇمكىن ەمەس” دەگەن قاعيدا ساقتالادى»، – دەلىنگەن حابارلامادا.
ەسكە سالايىق، بۇعان دەيىن شەرزات پولاتتىڭ ولىمىنە قاتىستى ءىس بويىنشا 9 ادام ءتۇرلى مەرزىمگە سوتتالعان ەدى. سولاردىڭ ءبىرى — راۆيل ساكيەۆ. ۇكىم جاريالانعان كۇنى سوت زالىندا بىرنەشە مارتە جانجال شىققانى حابارلانعان.
ۇقساس جاڭالىقتار
