قورعانىس مينيسترلىگى الەۋمەتتىك جەلىلەردە تاراعان ازاماتتاردى اسكەرگە ماجبۇرلەپ كولىككە وتىرعىزىپ، الىپ كەتۋگە قاتىستى رەسمي تۇسىنىكتەمە بەردى، دەپ حابارلايدى "ادىرنا" ۇلتتىق پورتالى.
مينيسترلىكتىڭ مالىمەتىنشە، قازاقستاندا اسكەري قىزمەتكە شاقىرۋ جىل سايىن زاڭ اياسىندا جۇرگىزىلەدى. الايدا ازاماتتاردىڭ شاقىرتۋ قاعازىن ۋاقىتىلى الماۋى جانە تىركەلگەن مەكەنجايدا تۇرماۋى سالدارىنان بىرقاتار قيىندىقتار تۋىنداۋدا.
"شاقىرۋ قاعازىن تاپسىرۋ مۇمكىن بولماعان جاعدايدا، اسكەرگە شاقىرىلۋشىنىڭ كەلۋىن قامتاماسىز ەتۋ مىندەتى ىشكى ىستەر ورگاندارىنا جۇكتەلەدى. كەيبىر ازاماتتار پوليتسيانىڭ زاڭدى تالاپتارىنا باعىنباي، قارسىلىق كورسەتۋدە. بۇل جاعدايلار ولاردى ماجبۇرلەپ اسكەري كوميسسارياتقا جەتكىزۋگە الىپ كەلۋدە", – دەلىنگەن قورعانىس مينيسترلىگىنىڭ حابارلاماسىندا.
بۇعان دەيىن ەكىباستۇز بەن قوستانايدا وسىنداي جايتتار تىركەلگەن. الەۋمەتتىك جەلىلەردە تاراعان ۆيدەولاردا جاستاردى پوليتسيا قىزمەتكەرلەرى كولىككە كۇشتەپ وتىرعىزىپ، بەلگىسىز باعىتقا الىپ كەتكەنى كورسەتىلگەن.
مينيسترلىك شاقىرۋ كوميسسياسىنىڭ شەشىمى تەك مەديتسينالىق تەكسەرۋدەن كەيىن قابىلداناتىنىن اتاپ ءوتتى.
"اسكەرگە جارامسىز دەپ تانىلعان ازاماتتار ۇيلەرىنە قايتارىلادى. ال جارامدى بولسا، ولار قوسىمشا تەكسەرۋلەردەن ءوتىپ، زاڭدا كوزدەلگەن تارتىپپەن اسكەري قىزمەتكە جىبەرىلەدى", – دەپ مالىمدەدى ۆەدومستۆو.
