ازەربايجان، تۇركيا جانە وزبەكستان ارنايى ماقساتتاعى كۇشتەرىنىڭ قاتىسۋىمەن «ماڭگىلىك باۋىرلاستىق – V» حالىقارالىق بىرلەسكەن وقۋ-جاتتىعۋى ءوتتى، دەپ حابارلايدى "ادىرنا".
ازەربايجان قورعانىس مينيسترلىگىنىڭ مالىمەتىنشە، وزبەكستاندا وتكەن جاتتىعۋدىڭ نەگىزگى ماقساتى — وڭىردەگى قاۋىپسىزدىك پەن تۇراقتىلىقتى نىعايتۋ، سونداي-اق ءۇش ەلدىڭ اسكەري ىنتىماقتاستىعىن دامىتۋ.
وقۋ-جاتتىعۋ بارىسىندا ارنايى بولىمشەلەر اراسىندا تاجىريبە الماسۋعا جانە بىرلەسكەن وپەراتسيالاردى جوسپارلاۋ مەن وتكىزۋ كەزىندەگى ءىس-قيمىل ۇيلەسىمدىلىگىن ارتتىرۋعا باسىمدىق بەرىلدى.
اسكەري قىزمەتشىلەر تاۋلى جانە ەلدى مەكەندەردەگى ۇرىس جاعدايىندا ارەكەت ەتۋ، شارتتى قارسىلاستىڭ تىلىنا ەنۋ، بارلاۋ-ىزدەستىرۋ جۇمىستارىن جۇرگىزۋ، ماڭىزدى نىسانداردى باسىپ الۋ جانە تەرروريزمگە قارسى وپەراتسيالار كەزىندە كەپىلدەگىلەردى بوساتۋ مىندەتتەرىن ورىندادى. سونداي-اق ستراتەگيالىق نىسانداردى كۇزەتۋ بويىنشا جاتتىعۋلار وتكىزىلدى.
جاۋىنگەرلەر كۇندىز جانە تۇندە ءتۇرلى كاليبرلى اتىس قارۋلارىنان، مەرگەندىك ۆينتوۆكالاردان جانە ارنايى قۇرالداردان وق اتۋ جاتتىعۋلارىن ورىندادى.
جاتتىعۋدىڭ قورىتىندى كەزەڭىن ازەربايجان ارنايى ماقساتتاعى كۇشتەرىنىڭ قولباسشىسى، گەنەرال-مايور الەكپەر دجاحانگيروۆ پەن وقۋ-جاتتىعۋ باسشىلىعى باقىلادى. ءىس-شارا سوڭىندا تاپسىرمالاردى ورىنداۋ كەزىندە ەرەكشەلەنگەن اسكەري قىزمەتشىلەر ماراپاتتالدى.
ايتا كەتەيىك، 21 قىركۇيەك پەن 1 قازان اراسىندا ازەربايجاندا تۇركيا مەن وزبەكستاننىڭ اسكەري قوسىندارى قاتىسقان «بىرلىك كۇشى – 2026» بىرلەسكەن اسكەري وقۋ-جاتتىعۋى دا وتكىزىلگەن. تۇركيا - ناتو ۇيىمىنىڭ مۇشەسى.
