Гарвард университеті бейсенбі күні шетелдік студенттердің АҚШ-қа кіруіне салынған тыйымға байланысты федералдық сотқа шағым түсірді, деп хабарлайды “Адырна”.
Арыз АҚШ президенті Дональд Трамп шетел азаматтарының Гарвардта оқуға келуіне тыйым салу туралы жарлыққа қол қойғаннан кейін 24 сағат өтпей түсірілді. Университет әкімшіліктің бұл әрекеті бұған дейінгі сот шешімін айналып өтуге бағытталғанын мәлімдеді. Ол шешім АҚШ-тың Ішкі қауіпсіздік министрлігіне Гарвардқа шетелдік студенттердің қабылдануына кедергі жасауға тыйым салған болатын.
"Президенттің бұл әрекеті АҚШ мүддесін қорғауға емес, үкіметтің Гарвардқа қарсы кек қайтаруын жалғастыруға бағытталған", – делінген сотқа берілген талап-арызда.
Гарвард университетінің президенті Алан Гарбер: "Шетелдік студенттерді қабылдау және әлемдегі басқа да оқу орындарымен әріптестік орнату мәселесінде университетке ерекше көзқарас таныту – бұл әкімшіліктің Гарвардтан кек қайтаруға бағытталған тағы бір заңсыз әрекеті", – деді талап-арыз түскен соң.
Сондай-ақ, ол университет шетелдік студенттер мен зерттеушілердің биылғы жазда және келесі оқу жылында оқуын әрі қарай жалғастыра алуы үшін "баламалы жоспарлар" әзірлеп жатқанын жеткізді.
