مەملەكەت باسشىسى قاسىم-جومارت توقاەۆ قازاقستاندىقتاردى قۇربان ايت مەرەكەسىمەن قۇتتىقتادى، دەپ حابارلايدى “ادىرنا”.
«ارداقتى اعايىن! قۇربان ايت مەرەكەسى قۇتتى بولسىن! بارشا مۇسىلمان قاۋىم ءۇشىن قاسيەتتى سانالاتىن بۇل مەيرام – يماندىلىق پەن ىزگىلىكتىڭ سيمۆولى. ايت كۇندەرى مۇقتاج جاندارعا جاقسىلىق جاساپ، كومەك كورسەتۋ – اتا-بابالارىمىزدان جالعاسىپ كەلە جاتقان يگى ءداستۇر»، - دەدى پرەزيدەنت.
قاسىم-جومارت توقاەۆ دىنىمىز ازاماتتاردى ءبىر-ءبىرىن قۇرمەتتەۋگە، جاقىندارىنا جاناشىر بولۋعا ۇندەپ، باۋىرلاستىق پەن سىيلاستىقتى دارىپتەيتىنىن اتاپ ءوتتى.
«حالقىمىزدىڭ بەرەكەلى بىرلىگى وسىنداي ىزگى قۇندىلىقتاردىڭ ارقاسىندا نىعايا تۇسەدى. قۇربان ايت – ىرىستى ىنتىماقتىڭ مەرەكەسى. ءبىز ەلىمىزدەگى تۇراقتىلىقتىڭ قادىرىن ءبىلىپ، تاتۋلىقتى ساقتاۋ ارقىلى كەز كەلگەن سىننان سۇرىنبەي ءوتىپ، بيىك ماقساتتارعا جەتەمىز. ادىلەتتى، تازا، قاۋىپسىز ءارى قۋاتتى قازاقستاندى بىرگە قۇرامىز. قۇربان ايت كەزىندە ايتىلار دۇعا-تىلەكتەر قابىل بولسىن! ءار شاڭىراققا قۇت-بەرەكە قونسىن! ايتتان ايتقا امان-ەسەن جەتە بەرەيىك!»، - دەپ تۇيىندەدى مەملەكەت باسشىسى.
ايتا كەتەرى، بيىل قۇربان ايت بۇگىن، 6 ماۋسىمدا باستالادى. وسىعان بايلانىستى قازاقستاندىقتار قاتارىنان ءۇش كۇن دەمالادى.
ۇقساس جاڭالىقتار
