ءبىر تاۋلىكتە رەسەيدىڭ بريانسك جانە كۋرسك وبلىستارىنداعى تەمىر جولدا ءۇش بىردەي اپات بولدى، دەپ حابارلايدى "ادىرنا" ۇلتتىق پورتالى.
بريانسك وبلىسىنداعى العاشقى پويىز اپاتىنان جەتى ادام قازا تاپتى، 69 ادام جاراقات الدى، ولاردىڭ ۇشەۋى — بالالار.
ء"ۇش ادامنىڭ جاعدايى اۋىر. جاراقات العانداردىڭ جالپى سانى – 44 ادام، ولار اۋرۋحاناعا جەتكىزىلدى جانە ءتيىستى مەديتسينالىق كومەك كورسەتىلۋدە. تاعى 22 ادام امبۋلاتورلىق ەم الىپ جاتىر", – دەپ مالىمدەدى ءوڭىر گۋبەرناتورى الەكساندر بوگوماز.
جەرگىلىكتى باق مالىمەتىنشە، اپاتقا كوپىردىڭ جارىلۋى سەبەپ بولعانى انىقتالعان. بۇل اقپاراتتى الەكساندر بوگوماز تا راستادى.
قازىرگى ۋاقىتتا زارداپ شەككەندەردى ەۆاكۋاتسيالاۋ اياقتالدى. قۇتقارۋشىلار ۇيىندىلەردى تازالاۋ جۇمىستارىن جۇرگىزىپ جاتىر.
زارداپ شەككەندەر اراسىندا قازاقستان ازاماتتارىنىڭ بار-جوعى ازىرگە بەلگىسىز.
بۇدان بولەك 1 ماۋسىمعا قاراعان ءتۇنى كۋرسك وبلىسىنداعى جەلەزنوگور اۋدانىنىڭ وستاپوۆو – ميحايلوۆسكي كەن ورنى اراسىنداعى وتكەلىندە تاعى تەمىرجول كوپىرى جارىلعان. سول ساتتە كوپىر ارقىلى ءوتىپ بارا جاتقان پويىز اۆتوكولىك جولىنا قۇلاپ كەتكەن. وقيعادان كەيىن تەپلوۆوز ورتەنىپ كەتكەن، الايدا تجم قىزمەتكەرلەرى ءورتتى جەدەل سوندىرگەن.
ايماق باسشىسى الەكساندر حينشتەين ءوزىنىڭ Telegram-ارناسىندا الدىن الا مالىمەت بويىنشا تەپلوۆوز ماشينيستەرىنىڭ ءبىرى اياعىنان جاراقات العانىن، ال بۇكىل بريگادا اۋرۋحاناعا جەتكىزىلگەنىن حابارلادى. قازىرگى ۋاقىتتا ولار دارىگەرلەردىڭ باقىلاۋىندا.
Telegram-داعى 112 ارناسىنىڭ حابارلاۋىنشا بريانسك وبلىسىندا پويىزعا قاتىستى تاعى ءبىر وقيعا ورىن العان.
ارنانىڭ مالىمەتىنشە، بەلگىسىز بىرەۋلەر ۋنەچا-جەچا وتكەلىندە تەمىرجولدى جارىپ جىبەرگەن. سول ساتتە بۇل جەردە جول جاعدايىن تەكسەرەتىن تەحنيكالىق پويىز ءوتىپ بارا جاتقان. ابىروي بولعاندا، ەشقانداي زاقىم كەلمەگەن، زارداپ شەككەندەر جوق.
Telegram-ارنا مالىمدەۋىنشە، وقيعا ورنىنا شۇعىل قىزمەتتەر جەتكەن، الايدا رەسمي ورگاندار مەن بيلىك تاراپىنان ازىرگە رەسمي اقپارات جاريالانعان جوق.
