تاجىكستاندا بىرنەشە شەنەۋنىككە قاتىستى سوت ۇكىم شىعاردى، دەپ حابارلايدى “ادىرنا” ۇلتتىق پورتالى “ازيا-پليۋس”-كە سىلتەپ.
5 اقپاندا تاجىكستاننىڭ جوعارعى سوتى "مەملەكەتتىك توڭكەرىس جاساۋعا ارەكەتتەندى" دەگەن ايىپ تاعىلعان بىرنەشە تۇلعانى ۇزاق مەرزىمگە باس بوستاندىعىنان ايىردى. كەيبىر سوتتالۋشىلار 27 جىلعا دەيىن باس بوستاندىعىنان ايىرىلدى.
سوت پروتسەسى ۇلتتىق قاۋىپسىزدىك مەملەكەتتىك كوميتەتىنىڭ (ۇقمك) تەرگەۋ يزولياتورى اۋماعىندا جابىق رەجيمدە ءوتتى. سوتتالعاندار قاتارىندا بۇرىنعى شەنەۋنىكتەر، ساياساتكەرلەر جانە جۋرناليستەر بار.
مالىمەتتەرگە سايكەس، تاجىكستان پارلامەنتىنىڭ دەپۋتاتى، دەموكراتيالىق پارتيانىڭ بۇرىنعى توراعاسى سايددجافار ۋسمونزودا مەن ەلدىڭ ەكس-سىرتقى ىستەر ءمينيسترى حامروحون زاريفي 27 جىلعا باس بوستاندىعىنان ايىرىلىپ، مۇلىكتەرى تاركىلەندى.
سونىمەن قاتار، سوتسيال-دەموكراتيالىق پارتيا توراعاسىنىڭ ورىنباسارى شوكيردجون حاكيموۆ پەن جۋرناليست، دەموكراتيالىق پارتيانىڭ بۇرىنعى باسشىسى احمادشوح كوميلزودا - 18 جىلعا، تاجىكستان جوعارعى كەڭەسىنىڭ بۇرىنعى توراعاسى اكبارشوح يسكانداروۆ پەن وتستاۆكاداعى پولكوۆنيك نۇرامين عانيزودا - 18 جىلعا، ال ءسىم-ءنىڭ بۇرىنعى باسقارما باسشىسى ابدۋلفايز اتوي 17 جىلعا سوتتالدى.
جۋرناليست رۋحشونا حاكيموۆا "مەملەكەتكە وپاسىزدىق جاسادى" دەگەن ايىپپەن 8 جىلعا باس بوستاندىعىنان ايىرىلدى. بۇعان دەيىن ونىڭ ەكى كىشكەنتاي بالاسىنىڭ بولۋىنا بايلانىستى بوستاندىقتا جۇرگەنى حابارلانعان. الايدا سوت ۇكىمى شىققاننان كەيىن ول زالدا تۇتقىندالدى.
«ازيا-پليۋس» مالىمەتىنشە، حاكيموۆاعا قاتىستى ءىس ونىڭ تاجىكستانداعى قىتاي ىقپالى تۋرالى سۇراۋ سالۋىمەن بايلانىستى بولعان.
ادام قۇقىعىن قورعايتىن حالىقارالىق ۇيىمدار سوۆەت وداعى تاراعاننان كەيىنگى ازاماتتىق سوعىستان بەرى ۇزبەي بيلىكتە وتىرعان يمامالي راحمون كەزەڭىندە تاجىكستاندا رەپرەسسيالىق ءتاسىل ۇستەم بولعانىن ايتادى.
