"اقتوبە" حوككەي كلۋبىنىڭ نەگىزگى قۇرامىنداعى ويىنشىلارى جۇمىس بەرۋشىگە قارسى سوتقا ۇجىمدىق تالاپ-ارىز ءتۇسىردى. بۇل تۋرالى Shaiba.kz Instagram ارناسى جازدى، دەپ حابارلايدى “ادىرنا”.
سپورتشىلاردىڭ ايتۋىنشا، كەلىسىمشارتتاردىڭ بۇزىلۋى ەڭبەك زاڭناماسىن ساقتاماي جۇزەگە اسقان.
2025 جىلعى 5 ناۋرىزدا كلۋب بىرقاتار حوككەيشىلەرمەن كەلىسىمشارتتى توقتاتتى. رەسمي سەبەپ رەتىندە كەلىسىمشارتتاعى 9.7.2 تارماعى كورسەتىلگەن. بۇل تارماق بويىنشا، كوماندا 2024–2025 جىلعى ماۋسىمداعى قازاقستان رەسپۋبليكاسى چەمپيوناتىنىڭ ەرلەر كوماندالارى اراسىنداعى ەكىنشى كەزەڭىنىڭ جارتىلاي فينالىنا وتە الماعان جاعدايدا كەلىسىمشارت بۇزىلادى. ەسكە سالايىق، "اقتوبە" ماۋسىمدى پلەي-وففتىڭ ءبىرىنشى كەزەڭىندە "تورپەدو" كومانداسىنان 1:4 ەسەبىمەن جەڭىلىپ اياقتاعان.
سوتقا جولدانعان تالاپتا سپورتشىلار بۇيرىقتى زاڭسىز دەپ تانۋدى سۇراپ وتىر. سونداي-اق، 7 ناۋرىزدان باستاپ كۇندەردى ءماجبۇرلى دەمالىس رەتىندە مويىنداپ، وسى ۋاقىت ءۇشىن جالاقى تولەۋدى جانە مورالدىق شىعىندى وتەۋدى تالاپ ەتۋدە. كەيبىر ويىنشىلار ءۇش جىلدىق كەلىسىمشارتتىڭ تەك ءبىر جىلىن عانا وتەگەن. ولاردىڭ ايتۋىنشا، كەلىسىمشارتتار بۇزىلعاننان كەيىن ولار جاتاقحانادان شىعارىلىپ، تاماقتاندىرۋ مەن جاتتىعۋ مۇمكىندىگىنەن ايىرىلعان.
اقپاراتقا سايكەس، ارىزدا 9.7.2 تارماعى Pro Hokei Ligasy ليگاسىنىڭ تيپتىك كەلىسىمشارتتارىنا تەك 2024–2025 جىلعى ماۋسىم باستالار الدىندا ەنگىزىلگەنى دە كورسەتىلگەن. الايدا ليگا دا، قازاقستان حوككەي فەدەراتسياسى دا ونىڭ ناقتى قولدانۋ ءتارتىبىن بەكىتپەگەن. بۇعان قوسا، حوككەيشىلەردىڭ مارتەبەسى مەن اۋىسۋى تۋرالى ەرەجەگە سايكەس، ەگەر كەلىسىمشارت كلۋبتىڭ باستاماسىمەن بۇزىلسا، سپورتشىعا كەلىسىمشارتتىڭ ورىندالماعان مەرزىمى ءۇشىن وتەماقى تولەنۋى ءتيىس. بۇل تالاپتار ورىندالماعان.
جاعدايمەن تانىس زاڭگەرلەر كلۋبتىڭ ارەكەتتەرى قازاقستان رەسپۋبليكاسىنىڭ ەڭبەك زاڭناماسىن جانە سپورتشىلاردىڭ قۇقىقتارىن بۇزادى دەپ سانايدى. بۇل — ليگا تاريحىندا كەلىسىمشارتتىڭ ءدال وسى تارماعىنا بايلانىستى سوتقا جۇگىنىپ وتىرعان العاشقى جاعداي.
