بۇگىن، 4 ءساۋىر سالتانات نۇكەنوۆانى ءولتىردى دەپ ايىپتالىپ جاتقان ەكس-مينيستر قۋاندىق بيشىمباەۆتىڭ كەزەكتى سوت وتىرىسى وتۋدە. سوت بارىسىندا بيشىمباەۆ پەن ايەلى نۇكەنوۆا ەكەۋىنىڭ جەكە حاتتارى وقىلدى، دەپ حابارلايدى “ادىرنا” ۇلتتىق پورتالى.
سوت بارىسىندا وقىلعان ەكەۋىنىڭ اراسىنداعى حات-حاباردان بيشىمباەۆ ايەلىنە ءتۇننىڭ ۋاقىتىندا قايتا-قايتا حابارلاسىپ، تىنىشتىق بەرمەيتىنى بايقالادى.
مەملەكەتتىك ايىپتاۋشى مارقۇم سالتانات نۇكەنوۆانىڭ تەلەفونىنان بيشىمباەۆ ەكەۋىنىڭ Whatsapp جەلىسىندەگى حاتتارىن وقىدى. مارقۇم بيشىمباەۆتى “My love” (مەنىڭ ماحابباتىم) دەپ ساقتاعان ەكەن. بيشىمباەۆ بۇل ءوز ءنومىرى ەكەنىن راستادى.
سونداي-اق، بيشىمباەۆ سالتاناتقا ءتۇن ىشىندە بىرنەشە مارتە حابارلاسقان.
“2:32, 2:38, 3:14, 3:19, 3:20, 3:32, 3:37, 3:39-دا بيشىمباەۆتىڭ قابىلدانباعان قوڭىراۋلارى تۇر. جاۋاپ بەرمەگەن ساتتە “سالتا، تۇتقانى كوتەر” دەپ جازعان، بىرنەشە اۋديوحابارلاما جىبەرگەن”، – دەدى پروكۋرور.
مەملەكەتتىك ايىپتاۋشى سالتاناتتىڭ تەلەفونىنداعى جەكە جازبالارىن (زامەتكي) دا وقىدى.
"قۋاندىق، مەن پاۆلودارعا كەتىپ بارام. ەندى كەلمەيمىن. بۇل كۇندەرى مەن ارامىزدا ەش سەزىم جوقتىعىنا كوزىم جەتتى. ەشتەڭەنى ساقتاپ قالعىم كەلمەيدى. سەن ءتىپتى كوزىمە ءشوپ سالعانىڭ ءۇشىن ءتىپتى كەشىرىم سۇراعان دا جوقسىڭ. ونىڭ ءۇشىن ەشتەڭە ىستەگىڭ دە كەلمەدى. بارىنە مەنى كىنالاپ، “پسيحوتەراپەۆتكە بار” دەپ قويمادىڭ. سوقىرلىعىڭ سونشا، ونىڭدى كوتەرە الار ەمەسپىن. كەشىر مەنى، ۇمىت، بوسات. ءبارىن شەشتىم. اتا-اناممەن بولام، ولار ماعان قارايدى", – دەپ جازعان سالتانات.
قۋاندىق بيشىمباەۆ “كوزىنە ءشوپ سالۋ” تۋرالى جازباعا قاتىستى پىكىر ءبىلدىردى.
"مەن پسيحوتەراپەۆت تۋرالى ونىڭ كونسۋلتاتسيادان ءوتۋى كەرەك ەكەنىن، ونىڭ جاعدايى تۇراقسىز ەكەنىن ايتا بەردىم. ساتقىندىققا قاتىستى: مەن جاي عانا كەشىگىپ، ساعات 21:30-دا كەلگەنىمە جانە ونىڭ بەينە قوڭىراۋلارىنا جاۋاپ بەرمەگەنىمە بايلانىستى ول قوناقۇيگە بارعاندا ايتتىم. "سالتانات، مەن ودان شارشادىم، باسقا نارسە ويلاپ تابا الاسىڭ با؟" دەدىم. ول قوناقۇيگە باردى. مەن ونى كۇتكەن جوقپىن. ەگەر ادام ۇنەمى كەتىپ قالسا، ول ماعان ءمان بەرمەيتىن شىعار. مەن دە: "مەن ۇيدە وتىرمايمىن، كۇتپەيمىن" دەدىم. سوسىن حات جازىسىپ قالدىق: ايەلدەردى ۇيگە نەگە اكەلەسىڭ", – دەدى.
ەسكە سالايىق، بۇرىنعى ۇلتتىق ەكونوميكا ءمينيسترى قۋاندىق بيشىمباەۆ ايەلى سالتانات نۇكەنوۆانى ولتىردى دەگەن كۇدىكپەن ۇستالعان. كەيىننەن قىلمىستى جاسىردى دەگەن ايىپپەن سالتانات نۇكەنوۆا كوز جۇمعان مەيرامحانانىڭ ديرەكتورى دا تۇتقىندالدى.
