الماتى قالاسى ناۋرىزباي اۋداندىق سوتىندا 27 مامىر كۇنى اقىن مۇقاعالي ماقاتاەۆتى قورلاعان بلوگەر الىشەر تەمەنوۆ ءوز شىندىعىن ايتىپ، وزىنە جانە وتباسىنا قىسىم جاسالعانىن مالىمدەدى. ول مورالدىق وتەماقى سوماسىن 500 مىڭ تەڭگەگە دەيىن تومەندەتۋدى سۇرادى. بۇل تۋرالى Orda.kz جازدى، دەپ حابارلايدى “ادىرنا”.
اقپاراتقا سايكەس، سوت وتىرىسى باستالماي تۇرىپ، بلوگەر Orda.kz ءتىلشىسىنىڭ زالدان شىعۋىن سۇرادى. ونىڭ ايتۋىنشا، الدىڭعى جاريالانعان ماتەريالداردان كەيىن وزىنە قىسىم كورسەتىلگەن. الايدا سۋديا بەينەگۇل قايسينا بۇل ءىستىڭ اشىق ءوتىپ جاتقانىن جانە مۇقاعالي ماقاتاەۆتىڭ جاي ازامات ەمەس ەكەنىن ايتىپ، ءوتىنىشتى قاناعاتتاندىرمادى.
اقىننىڭ ۇلى جۇلدىز ماقاتاەۆ بۇعان دەيىنگى سوت وتىرىسىندا مورالدىق شىعىن رەتىندە 10 ميلليون تەڭگە تالاپ ەتكەن بولاتىن. ال بۇگىنگى وتىرىستا ايىپتالۋشى وتەماقىنى 500 مىڭ تەڭگەگە دەيىن ازايتۋدى سۇرادى.
سۋديا جابىرلەنۋشى جۇلدىز ماقاتاەۆتان جاۋاپ الدى.
«2024 جىلدىڭ قازان ايىندا الىشەر تەمەنوۆ TikTok پاراقشاسىندا «تۋعان كۇنىم» ولەڭىنە بايلانىستى بەينەجازبا جاريالاپ، مەنىڭ اكەمدى – قازاق پوەزياسىندا ءوز ورنى بار، حالقىمىز قادىر تۇتاتىن تۇلعانى – بىلاپىت سوزدەرمەن بالاعاتتادى. ول جەردە: «ەي، سەن، ب***, كەشكە دەيىن جىلاي بەرەتىن سورلى ەركەكسىڭ» دەگەن سوزدەر ايتىلدى»، — دەدى جۇلدىز ماقاتاەۆ.
الايدا اتالعان بەينەجازبا بلوگەردىڭ پاراقشاسىنان كەيىنىرەك جويىلدى. سوعان قاراماستان، ۆيدەو بىرقاتار ينتەرنەت رەسۋرستاردا جاريالانىپ ۇلگەرگەن.
سوت وتىرىسىندا الىشەر تەمەنوۆ ءوز كىناسىن مويىنداپ، كەشىرىم سۇرادى.
«قاتەلىگىمدى تولىق مويىندايمىن. ۆيدەونى 2024 جىلعى 4 قازاندا جاريالادىم. ول بار بولعانى بەس مينۋت تۇردى. ءبىر جۋرناليست كوشىرىپ، Facebook پاراقشاسىنا جاريالاپ جىبەرىپتى. سول ساتتە سالدارىن ءتۇسىنىپ، ۆيدەونى ءوشىردىم. بىراق كەيىن وزىمە، وتباسىم مەن اۋىلداعى اتا-اناما قىسىم جاسالا باستادى. سول كۇنى تۇندە قاراسازعا جولعا شىقتىم. جولاي ءوز اۋىلىما بارسام، اتا-انامنىڭ ءۇيىنىڭ الدىندا ءبىر توپ ادام جينالىپ تۇر ەكەن. مەن ولاردىڭ تالابىمەن پاراقشامدى تولىقتاي جويىپ، مۋزەي الدىندا اۋىل تۇرعىندارىنان كەشىرىم سۇرادىم»، — دەدى ول.
جاۋاپ الۋ كەزىندە بلوگەر پوەزيانى زەرتتەيتىنىن جانە ولەڭ وقيتىنىن ايتتى. جابىرلەنۋشى تاراپتىڭ ادۆوكاتى: «مۇقاعاليدى بۇرىننان بىلەتىن بە ەدىڭ؟» دەپ سۇراق قويدى، الايدا تەمەنوۆ ناقتى جاۋاپ بەرە المادى. سۇراققا ناقتى جاۋاپ بەرمەگەنى ءۇشىن سۋديا ەسكەرتۋ جاساپ، ءسوزىن بولمەۋگە جانە ساۋالدارعا ناقتى جاۋاپ بەرۋگە مىندەتتەدى.
بلوگەر سونىمەن بىرگە ءوزىنىڭ اۋىر ماتەريالدىق جاعدايىن ايتتى: بانكتە نەسيەلەرى بار ەكەنىن، ايەلى ەكىنشى بالاسىنا جۇكتى ەكەنىن، ءبىر جاسار بالاسى بارىن ايتىپ، سۇرالعان وتەماقىنى 10 ميلليوننان 500 مىڭ تەڭگەگە دەيىن ءتۇسىرۋدى سۇرادى.
تاراپتار مامىلەگە كەلە الماعان سوڭ، بلوگەردىڭ قورعاۋشىسى ءۇزىلىس سۇرادى. بىراق 15 مينۋتتىق ۇزىلىستەن كەيىن دە كەلىسىمگە كەلە المادى. سوت وتىرىسى 16 ماۋسىمعا شەگەرىلدى.
ەسكە سالايىق، بىلتىر 8 قازاندا الىشەر تەمەنوۆ الەۋمەتتىك جەلىدەگى پاراقشاسىندا مۇقاعاليدى «سورلى ەركەك» دەپ بالاعاتتاپ، بەينەجازبا جاريالادى. وسى ارەكەتىنە بايلانىستى قىلمىستىق كودەكستىڭ 131-بابى 2-تارماعى («قورلاۋ») بويىنشا ءىس قوزعالدى.
