24 مامىردا قازاقستان پرەزيدەنتى قاسىم-جومارت توقاەۆ ەربولات دوساەۆتى الماتى قالاسىنىڭ اكىمى قىزمەتىنەن بوساتۋ تۋرالى جارلىققا قول قويدى، دەپ حابارلايدى “ادىرنا” ۇلتتىق پورتالى.
«مەملەكەت باسشىسىنىڭ جارلىعىمەن دوساەۆ ەربولات اسقاربەكۇلى الماتى قالاسىنىڭ اكىمى قىزمەتىنەن بوساتىلدى»، – دەلىنگەن اقوردانىڭ Telegram ارناسىندا جاريالانعان رەسمي حابارلامادا.
ەربولات دوساەۆ بۇل لاۋازىمدى 2022 جىلعى 31 قاڭتاردان بەرى اتقارىپ كەلگەن بولاتىن.
ايتا كەتەيىك، وسىعان دەيىن، 23 مامىر كۇنى الماتى قالاسى ءماسليحاتىنىڭ VIII شاقىرىلىم دەپۋتاتتارىنىڭ جينالىسى وتەتىنى حابارلانعان ەدى. كۇن تارتىبىندە – قالا اكىمى لاۋازىمىنا كەلىسىم بەرۋ ماسەلەسى تۇرعان.
ول 1970 جىلعى 21 مامىردا الماتى قالاسىندا دۇنيەگە كەلگەن.
الماتى ەنەرگەتيكالىق ينستيتۋتىن، باۋمان اتىنداعى ماسكەۋ مەملەكەتتىك تەحنيكالىق ۋنيۆەرسيتەتىن ءبىتىردى.
1997 جىلى «تۇران الەم بانكى» جاق باسقارما توراعاسىنىڭ ورىنباسارى، «اتف بانك» جاق باسقارما توراعاسى قىزمەتىن، 1998 جىلى قازاقستان رەسپۋبليكاسى پرەمەر-ءمينيسترىنىڭ كەڭەسشىسى بولدى.
1998 جىلى قازاقستان رەسپۋبليكاسىنىڭ ەنەرگەتيكا، يندۋستريا جانە ساۋدا ۆيتسە-ءمينيسترى، ەكى جىلدان سوڭ قازاقستان رەسپۋبليكاسىنىڭ قارجى ۆيتسە-ءمينيسترى، 2001 جىلى قازاقستاننىڭ دامۋ بانكى ديرەكتورلار كەڭەسىنىڭ توراعاسى قىزمەتىن اتقارعان.
2001-2003 جج. – قازاقستان رەسپۋبليكاسىنىڭ تابيعي مونوپوليالار، باسەكەلەستىكتى قورعاۋ جانە شاعىن بيزنەستى قولداۋ اگەنتتىگىنىڭ توراعاسى، 2003-2004 جىلدارى قازاقستان رەسپۋبليكاسىنىڭ قارجى ءمينيسترى; قازاقستانداعى ەۋروپالىق قايتا قۇرۋ جانە دامۋ بانكىنىڭ (ەقدب) باسقارۋشىسى; قازاقستان رەسپۋبليكاسى ۇلتتىق بانكىنىڭ باسقارما مۇشەسى بولدى.
ال 2004-2006 جىلدار ارالىعىندا قازاقستان رەسپۋبليكاسىنىڭ دەنساۋلىق ساقتاۋ ءمينيسترى قىزمەتىندە بولدى.
2004 جىلى قر دەنساۋلىق ساقتاۋ ءمينيسترى قىزمەتىن اتقارعان تۇستا شىمكەنت قالاسىندا 150 بالا ايتۆ (ۆيچ) جۇقتىرعان وقيعا ورىن العان. وسى قايعىلى جاعدايدىڭ سالدارىنان ول وتستاۆكاعا كەتكەن بولاتىن.
2006-2012 جج. «قازينۆەستبانك» اق ديرەكتورلار كەڭەسىنىڭ توراعاسى، 2012 جىلعى 25 قىركۇيەكتەن باستاپ قازاقستان رەسپۋبليكاسىنىڭ ەكونوميكالىق دامۋ جانە ساۋدا ءمينيسترى بولىپ تاعايىندالعان.
2013 جىلعى 16 قاڭتاردان باستاپ قازاقستان رەسپۋبليكاسىنىڭ ەكونوميكا جانە بيۋدجەتتىك جوسپارلاۋ ءمينيسترى بولسا، 2014 جىلعى 6 تامىزدا قازاقستان رەسپۋبليكاسى پرەزيدەنتىنىڭ جارلىعىمەن (№ 880) قازاقستان رەسپۋبليكاسىنىڭ ۇلتتىق ەكونوميكا ءمينيسترى بولىپ تاعايىندالدى.
ۇلتتىق ەكونوميكا ءمينيسترى لاۋازىمىندا جۇرگەن كەزىندە قازاقستانداعى 1,7 ميلليون گەكتار اۋىل شارۋاشىلىعى جەرىن اۋكتسيون ارقىلى ساتۋعا مۇمكىندىك بەرەتىن زاڭ جوباسىن ۇسىنعان. بۇل باستاما ەل ىشىندە ۇلكەن نارازىلىق تۋعىزىپ، حالىقتىڭ “جەر ساتۋعا قارسى” شەرۋلەرىمەن اياقتالدى. ناتيجەسىندە ەربولات دوساەۆ بۇل قىزمەتىنەن دە ءوز ەركىمەن كەتتى.
بۇدان بولەك، دوساەۆ قارجى سالاسىنداعى ىقپالدى تۇلعالاردىڭ ءبىرى رەتىندە بەلگىلى. Forbes Kazakhstan جۋرنالىنىڭ دەرەكتەرىنە سۇيەنسەك، ول 2013 جانە 2014 جىلدارى قازاقستانداعى ەڭ باي 50 ادامنىڭ قاتارىنا ەنگەن. 2014 جىلى ونىڭ بايلىعى 110 ميلليون اقش دوللارىنا باعالانعان. نەگىزگى تابىس كوزدەرى رەتىندە مۇناي، مۇناي سەرۆيستىك قىزمەتتەرى، قارجى جانە بايلانىس سالالارى اتالدى.
2016 جىلعى مامىردان باستاپ 2017 جىلعى تامىز ارالىعىندا – «بايتەرەك» ۇلتتىق باسقارۋشى حولدينگى» اكتسيونەرلىك قوعامىنىڭ باسقارما توراعاسى.
2017 جىلعى تامىزدان باستاپ 2019 جىلعى اقپان ارالىعىندا قازاقستان رەسپۋبليكاسى پرەمەر-ءمينيسترىنىڭ ورىنباسارى لاۋازىمىندا جۇمىس ىستەدى.
2019 جىلعى 25 اقپانىنان باستاپ 2022 جىلعى قاڭتار ارالىعىندا – قازاقستان رەسپۋبليكاسى ۇلتتىق بانكىنىڭ توراعاسى بولدى.
سونداي-اق، ەكس-اكىم ەربولات دوساەۆ الماتىداعى ماسەلەلەر بويىنشا ەكى اپتا سايىن پرەزيدەنتكە ەسەپ بەرەتىنى دە ايتىلعان. وسى جىلدىڭ 29 ناۋرىزىندا الماتىعا وزبەكستان پرەزيدەنتى شاۆكات ميرزيويوۆ ساپارلاپ، قازاقستان پرەزيدەنتى وعان قالانىڭ كورىكتى ورىندارىن كورسەتكەن. سونىڭ سالدارىنان الماتىدا كوشەلەر جابىلىپ، كوپشىلىك ادەتتەن تىس كوبىرەك كولىك كەپتەلىسىندە تۇرىپ، الەۋمەتتىك جەلىدە شاعىنعان جازبالار جاريالادى. قالا تۇرعىندارى بىرنەشە رەت جول جوندەۋ جۇمىستارى مەن كەپتەلىسكە، قالا كوشەلەرىنىڭ تازالىعى مەن جارىقتاندىرۋعا ءجيى شاعىمدانىپ، دوساەۆتىڭ وتستاۆكاسىن تالاپ ەتكەن.
ۇقساس جاڭالىقتار
