ۋكراينا پرەزيدەنتى ۆلاديمير زەلەنسكي دونالد ترامپتى اقش پرەزيدەنتتىگىنە كانديدات رەتىندە ۇسىنىلۋىمەن قۇتتىقتاپ، ساتتىلىك تىلەدى، - دەپ حابارلايدى “ادىرنا” ۇلتتىق پورتالى Deutsche Welle-گە سىلتەمە جاساپ.
«مەن دونالد ترامپپەن سويلەستىم جانە ونى رەسپۋبليكالىق پارتيادان پرەزيدەنت سايلاۋىنا ۇسىنىلعانىمەن قۇتتىقتادىم. سونىمەن قوسا پەنسيلۆانياداعى جان تۇرشىگەرلىك قاستاندىقتى ايىپتادىم»، - دەپ جازدى زەلەنسكي اقش-تىڭ بۇرىنعى پرەزيدەنتىمەن تەلەفون ارقىلى سويلەسكەنىن 20 شىلدە، سەنبىگە قاراعان ءتۇنى X الەۋمەتتىك جەلىسىندە (بۇرىنعى Twitter) مالىمدەپ.
ونىڭ سوزىنشە، ترامپپەن اڭگىمەدە ول "ۋكراينانىڭ بوستاندىعى مەن تاۋەلسىزدىگىن اقش-تىڭ قوس پالاتاسى مەن قوس پارتياسىنىڭ قولداۋى ماڭىزدى" ەكەنىن اتاپ وتكەن. "الەمدى ادىلەتتى ءارى بەرىك ەتەتىن" قادامداردى ەكى ساياساتكەر جەكە كەزدەسۋ كەزىندە تالقىلاۋعا كەلىسكەن. ۋكراينا باسشىسى بۇل تۇستا ترامپتى "پرەزيدەنت" دەپ اتايدى.
ترامپ تا زەلەنسكيمەن "وتە جاقسى" اڭگىمەلەسكەنىن ايتىپ، "اقش-تىڭ پرەزيدەنتى بولعان جاعدايدا سوعىستى توقتاتىپ، الەمگە بەيبىتشىلىك اكەلۋگە" ۋادە بەردى. ول بۇل تۋرالى Truth Social جەلىسىندە جاريالاعان.
سونىمەن بىرگە زەلەنسكي ترامپپەن جانە ونىڭ كومانداسىمەن ولاردىڭ ۇسىنىستارىن تىڭداۋ ءۇشىن كەزدەسۋگە «دايىن» ەكەنىن ايتتى.
«ءبىز قاراشا ايىندا اقش-تىڭ كۇشتى قولداۋىنا يە بولامىز با، الدە ءبىز تولىعىمەن جالعىز قالامىز با، سونى تۇسىنگىمىز كەلەدى»، - دەپ قوستى ول.
قوسا كەتەيىك، اقش-تا پرەزيدەنت سايلاۋى 2024 جىلى 5 قاراشادا وتەدى.
