تانىمال كاسىپكەر، BI Group قۇرىلىس حولدينگىنىڭ نەگىزىن قالاۋشى ءارى ديرەكتورلار كەڭەسىنىڭ توراعاسى ايدىن راحىمباەۆ ءوزىنىڭ دەنساۋلىعىنا قاتىستى Instagram پاراقشاسىندا جازبا جاريالادى. ول ءسۇت ونىمدەرىنىڭ اعزاعا زيانى تۋرالى عىلىمي زەرتتەۋلەرگە توقتالىپ، ءوزىنىڭ جەكە تاجىريبەسىمەن ءبولىستى، دەپ حابارلايدى “ادىرنا”.
كاسىپكەر بىرنەشە جىل بۇرىن تىزە بۋىنى اۋىرعانىن، كەيىن بۇل سىرقاتتىڭ سەبەبى اعزادا تۇز جينالۋى ەكەنىن انىقتاعانىن ايتتى. ول گەرمانيادا ەمدەلىپ، بۋىندارىنداعى تۇزدان ارىلۋ ءۇشىن وتا جاساتقان.
“بىرنەشە جىل بۇرىن جۇگىرىپ جۇرگەندە مەنىڭ تىزەم اۋىرا باستادى. تەكسەرۋدەن وتسەم، بۋىندارىما تۇز جينالىپتى. گەرمانيادا وتا جاساتىپ، ءبارىن تازالاتتىم. عىلىمي زەرتتەۋلەر الەمدەگى ۇلكەن كىسىلەرگە ءسۇتتىڭ زيان ەكەنىن دالەلدەگەن. سونىڭ ىشىندە، ازياداعى قارت كىسىلەردىڭ 90 پايىزىنا ءسۇت ءىشۋ زيان بولىپتى. مەنى بۇل جاڭالىق توق سوققانداي، وياتىپ جىبەردى",– دەدى ول.
كاسىپكەردىڭ ايتۋىنشا، ول داكار ءرالليى الدىندا ەۋروپاداعى تاعامتانۋ ينستيتۋتتارىنىڭ بىرىندە تەكسەرۋدەن وتكەن. اناليز قورىتىندىلارىن كورگەن دارىگەر ونىڭ كۇندەلىكتى ءسۇت ونىمدەرىن قانشالىقتى ءجيى قولداناتىنىن سۇراعاندا، راحىمباەۆ دارىگەردىڭ رەاكتسياسىنا تاڭ قالعانىن جەتكىزدى.
"داكار الدىندا ەۋروپاداعى تاماقتانۋ ينستيتۋتتارىنىڭ بىرىنە باردىم. دارىگەر مەنىڭ اناليزدەرىمدى تەكسەرىپ، ءسۇتتى قانشالىقتى كوپ ىشەتىنىم تۋرالى سۇرادى. مەن تاڭەرتەڭ سۇتپەن بوتقا جەيتىنىمدى، ءسۇت قوسقان سپورتتىق كوكتەيل مەن ءسۇتتى شاي ىشەتىنىمدى ايتتىم. دارىگەر تاڭعالىپ، ءسۇتتىڭ قۇرامىندا لاكتوزا بارىن ەسكەرتتى. ونى ەرەسەك ادامنىڭ اعزاسى كوپ جاعدايدا قورىتا المايدى ەكەن. لاكتوزا گليۋكوزا مەن گالاكتوزاعا ىدىراپ، اعزادان تولىق شىعىپ كەتپەيدى. گالاكتوزا ء(سۇت قىشقىلى) بۋىندارعا جينالىپ، ارتريت پەن تىزەگە تۇز جينالۋىنا اكەلەدى. ءبىزدىڭ اتالارىمىز ءسۇتتىڭ زيانى تۋرالى بىلمەسە دە، ءبىز زاماناۋي زەرتتەۋلەردى ەسكەرۋىمىز كەرەك. بۇل تۋرالى جاقىندارىڭىزعا ايتىپ، اتا-اپالارعا ەسكەرتىڭىزدەر",– دەيدى كاسىپكەر.
