Bombardiro Krokodilo, Tralalero Tralala ءتارىزدى مۋلتفيلمدەر بالالاردا مازاسىزدىق پەن اگرەسسيا تۋعىزادى. بۇل تۋرالى وقۋ-اعارتۋ مينيسترلىگىنە قاراستى بالالار قۇقىعىن قورعاۋ كوميتەتى مالىمدەمە جاسادى، دەپ حابارلايدى “ادىرنا”.
«بالالاردىڭ قۇقىعىن قورعاۋ كوميتەتى سىرتتاي بەيكۇنا كورىنەتىن، بىراق ىشىندە جاسىرىن تۇردە تەرىس ماعىناداعى يدەيالاردى تاراتاتىن ينتەرنەتتەگى مۋلتفيلمدەردىڭ كوبەيگەنىنە الاڭداۋشىلىق بىلدىرەدى. مۇنداي ۆيدەولار بالالارعا بۇرمالانعان وبرازداردى ۇسىنىپ، مازاسىزدىق پەن اگرەسسيا تۋعىزادى، سونداي-اق نەگىزگى ادامگەرشىلىك قۇندىلىقتارعا نۇقسان كەلتىرەدى»، – دەپ جازىلعان كوميتەت مالىمدەمەسىندە.
وسىعان بايلانىستى كوميتەت نورماتيۆتىك-قۇقىقتىق بازانى جەتىلدىرۋگە ۇسىنىستار ازىرلەپ جاتىر. ءتيىستى حاتتار مادەنيەت جانە اقپارات مينيسترلىگىنە، سونداي-اق ىشكى ىستەر مينيسترلىگىنە جولدانادى.
«بالالارىڭىزدىڭ نە كورىپ جۇرگەنىنە، كىممەن ارالاساتىنىنا جانە ينتەرنەتتە قانداي تاقىرىپتاردى تالقىلايتىنىنا ەرەكشە نازار اۋدارۋىڭىزدى سۇرايمىز. بالاڭىزبەن ۇنەمى سويلەسىپ، ونىڭ سىني ويلاۋ قابىلەتىن جانە زياندى اقپاراتقا قارسى يممۋنيتەتىن دامىتىڭىز. كۇدىك تۋدىراتىن كونتەنتتى بايقاساڭىز، بىردەن ءتيىستى ورگاندارعا حابار بەرىڭىز. بالانىڭ تسيفرلىق كەڭىستىكتەگى قاۋىپسىزدىگى ءۇشىن ەڭ ماڭىزدى فاكتور – ءسىزدىڭ بەلسەندى قاتىسۋىڭىز»، – دەپ اتاپ ءوتتى مينيسترلىك.
الەۋمەتتىك جەلىلەردە كەڭىنەن تاراعان «بومبارديرو كروكوديلو» جانە «ترالالەلو ترالالا» اتتى كەيىپكەرلەر جاسوسپىرىمدەر اراسىندا ترەندكە اينالعان.
