پرەزيدەنتتىككە كانديدات قاراقات ابدەن وتباسى جانە دەموگرافيا مينيسترلىگىن قۇرۋدى ۇسىندى. بۇل تۋرالى تۇركىستان قالاسىندا وتكەن سايلاۋالدى كەزدەسۋدە بەلگىلى بولدى.
كانديدات اتاپ وتكەندەي، قوعامداعى كوپ ماسەلەلەردىڭ ءتۇپ-تامىرى وتباسىدان تارايدى. بالالاردىڭ ۇلگەرىمى، تۇلعا رەتىندە قالىپتاسۋى، سۋيتسيد، تۇرمىستىق زورلىق-زومبىلىق، انالار مەن قاريالارعا قاتىستى پروبلەمالاردىڭ بارلىعى وتباسىنداعى تاربيەگە بارىپ تىرەلەدى. قازىر وتباسى ماسەلەسى ءتۇرلى ۆەدومستۆولاردىڭ اراسىندا شاشىراپ ءجۇر. ونىڭ ايتۋىنشا، وتباسى ماسەلەلەرىمەن الەۋمەتتىك قورعاۋ، اعارتۋ، عىلىم جانە جوعارى ءبىلىم، دەنساۋلىق ساقتاۋ، ىشكى ىستەر مينيسترلىكتەرى، اكىمدىكتەر مەن وزگە دە ورگاندار اينالىسادى.
«وتباسى جانە دەموگرافيا ماسەلەلەرىمەن اينالىسىپ جۇرگەن قۇزىرەتتى ۆەدومستۆولاردىڭ اراسىندا ءوزارا بايلانىس جوق. وتباسى ينستيتۋتىن بۇلايشا قولداۋ مۇمكىن ەمەس. وتباسى مەن وتباسى مۇشەلەرى بۇل مينيسترلىكتەر ءۇشىن - ينديكاتور عانا. مىسالى، جۇپتاردىڭ اجىراسۋى ەش تراگەديا ەمەس، بازاداعى جازبانىڭ وزگەرۋى عانا. مەمورگانداردىڭ ەشقايسىسى ازاماتتارعا "وتباسى", "وتباسى مۇشەسى" دەگەن تۇتاس ۇعىممەن قارامايدى، جەكەلەگەن ادام رەتىندە عانا قارايدى. ال بىزگە ەڭ الدىمەن وتباسى ماڭىزدى. ونىڭ تۇتاستىعى، باقىتتى بولۋى ماڭىزدى»، - دەدى ۇندەۋىندە كانديدات.
ءوز سوزىندە ق.ابدەن حالىق سانىنىڭ ءوسۋى مەن بەرىك وتباسى – كەز كەلگەن دامىعان ەلدىڭ ۇمتىلاتىن باستى ماقساتى ەكەندىگىن جەتكىزىپ، وتباسىن قولداۋ جانە نىعايتۋ — ەلدىڭ تابىستى دامۋىنىڭ كەپىلى بولا الاتىنىن ايتتى.
بۇدان بولەك، كەزدەسۋ بارىسىندا سايلاۋشىلارمەن وزگە دە وزەكتى الەۋمەتتىك-قوعامدىق سۇراقتار تالقىلاندى.
ەسكە سالساق، ەلىمىزدە 20 قاراشا كۇنى كەزەكتەن تىس پرەزيدەنت سايلاۋى وتەدى. كانديدات ق.ابدەن ەل ايماقتارىن ارالاپ، 9 وبلىستا 30-دان استام كەزدەسۋ وتكىزدى. الداعى ۋاقىتتا ول جامبىل وبلىسى سايلاۋشىلارىمەن جۇزدەسەدى.
تاپسىرىس بەرۋشى: قازاقستان رەسپۋبليكاسى پرەزيدەنتتىگىنە كانديدات ق.ج.ابدەننىڭ سەنىمدى وكىلى ا.س.ۋرازگۋلوۆ.
ماقالا اقىسى قازاقستان رەسپۋبليكاسى پرەزيدەنتتىگىنە كانديدات ق.ج.ابدەننىڭ سايلاۋ قورىنىڭ قارجىسىنان تولەندى.
