ەلىمىزدەگى بارلىق ءبىلىم بەرۋ ۇيىمدارىندا #كۇيكۇمبىرى رەسپۋبليكالىق چەللەندجى ءوتتى، دەپ حابارلايدى “ادىرنا” ۇلتتىق پورتالى وقۋ-اعارتۋ مينيسترلىگىنىڭ ءباسپاسوز قىزمەتىنە سىلتەپ.
ءبىر ۋاقىتتا ەكى ميلليونعا جۋىق بالا قۇرمانعازىنىڭ «بالبىراۋىن»، «اداي»، «سارىارقا» كۇيلەرىن ورىندادى.
استاناداعى رايىمبەك باتىر اتىنداعى № 50 «قازعارىش» مەكتەپ-ليتسەيى وقۋشىلارىنىڭ قاتارىنا وقۋ-اعارتۋ ءمينيسترى عاني بەيسەمباەۆ قوسىلدى. چەللەندج قاتىسۋشىلارىنا ارناعان سوزىندە ۆەدومستۆو باسشىسى سوڭعى ۋاقىتتا ەلىمىزدە دومبىرادا ويناعىسى كەلەتىندەردىڭ سانى ەداۋىر ارتقانىن اتاپ ءوتتى.
«كونەدەن كەلە جاتقان بۇل ۇلتتىق اسپابىمىز حالقىمىزدىڭ جانىن، ونىڭ ءداستۇرى مەن مادەنيەتىن بەينەلەيدى. ۇلتتىڭ رۋحىن كوتەرىپ، داڭقىن اسقاقتاتقان دومبىرا ءبىزدىڭ باعا جەتپەس بايلىعىمىز بەن ۇلتتىق سيمۆولىمىزعا اينالدى. ءبىزدىڭ وقۋشىلارىمىز، ولارمەن بىرگە بالاباقشالاردىڭ كىشكەنتاي تاربيەلەنۋشىلەرى، كوللەدج ستۋدەنتتەرى ۇلتتىق اسپاپتا ويناۋعا قىزىعۋشىلىق تانىتاتىنى قۋانتادى. بۇگىندە ەلىمىزدىڭ ءار وڭىرىندە ءبىر مەزەتتە كۇيلەر مەن تانىمال كومپوزيتورلاردىڭ شىعارمالارى شىرقالدى. ولاردىڭ تۋىندىلارى ارقىلى ءبىزدىڭ مادەني قۇندىلىقتارىمىز ۇرپاقتان-ۇرپاققا بەرىلەدى. ءبىزدىڭ وسكەلەڭ ۇرپاق وسى كيەلى ونەردى ۇلىقتاۋدى لايىقتى تۇردە جالعاستىرادى دەپ سەنەمىن", - دەدى عاني بەيسەمباەۆ.
مەرەكەلىك ەستافەتاعا ەكى ميلليونعا جۋىق قازاقستاندىق بالا قوسىلدى. چەللەندج سوڭىندا مينيستر مەكتەپتىڭ 300 وقۋشىسىمەن بىرگە حالىق كۇيىن ورىندادى. قاتىسقان بالالاردىڭ ەڭ كىشكەنتايلارى - اباي وبلىسى، سەمەي قالاسىنداعى «باقىت» بالاباقشاسىنىڭ تاربيەلەنۋشىلەرى.
ەستەرىڭىزگە سالا كەتەيىك، دومبىراشىلار چەللەندجى ءاز-ناۋرىز قارساڭىندا ۇيىمداستىرىلاتىن كەڭ اۋقىمدى رەسپۋبليكالىق اكتسيا. ول بىلتىر العاش رەت مينيسترلىكتىڭ باستاماسىمەن وتكىزىلگەن بولاتىن. تەك سوڭعى ءبىر جىلدىڭ وزىندە ەلىمىزدە دومبىرا ۇيىرمەلەرىنىڭ سانى 5 ەسە ارتتى. بۇگىنگى تاڭدا بارلىعى 2 مىڭ ۇيىرمە جۇمىس ىستەيدى. وعان 100 مىڭنان استام جاس دومبىراشى قاتىسادى.
