البانيا استاناسى تيرانادا وتكەن ەۋروپالىق ساياسي قاۋىمداستىق سامميتىندە تۇركيا پرەزيدەنتى رەجەپ تايىپ ەردوعان مەن فرانتسيا پرەزيدەنتى ەممانۋەل ماكروننىڭ اراسىندا قىزىقتى جايت ورىن الدى، دەپ حابارلايدى "ادىرنا" ۇلتتىق پورتالى Ria-عا سىلتەپ.
تۇرىك ءجۋرناليسى يبراگيم حاسكولوگلۋ بۇل ساتكە الەۋمەتتىك جەلىدە نازار اۋدارىپ، كوپشىلىكتىڭ تالقىسىنا سەبەپ بولدى.
حاسكولوگلۋدىڭ جازۋىنشا، كەزدەسۋدە ماكرون ەردوگانعا جاقىنداپ، ونىڭ ۇستەل ۇستىندەگى قولىنىڭ ۇستىنە ءوز قولىن قويعان. ال ەردوعان ماكروننىڭ ساۋساعىنان ۇستاپ الىپ، ۇزاق ۋاقىت بويى جىبەرمەي قويعان.
بەينەجازبادان كورىنگەندەي، ەردوعان الدىمەن ءوز قولىن تەز تارتىپ الىپ، بىراق ماكروننىڭ ەكى ساۋساعىن ۇستاعان. فرانتسيا پرەزيدەنتى ءبىر ساۋساعىن بوساتىپ العانىمەن، تۇركيا پرەزيدەنتى ونىڭ ەكىنشى ساۋساعىن تاعى كەمىندە ون سەكۋندتاي ۇستاپ وتىرعان. بۇل ساتتە تۇركيا باسشىسى جايدارى جىميىپ، ورنىنان تۇرماعان.
تۇركيالىق Yeni Şafak باسىلىمى بۇل ارەكەتتى ماكروننىڭ پسيحولوگيالىق ۇستەمدىك ورناتۋعا جاساعان ارەكەتى دەپ باعالادى. الايدا، ەردوعاننىڭ بۇل يشاراعا توسىن ءارى ءوز ستيلىندە جاۋاپ بەرگەنى بايقالادى.
ايتا كەتەيىك، بۇل سامميتتە ەۋروپا ەلدەرىنىڭ باسشىلارى جينالىپ، ماڭىزدى كەلىسسوزدەر جۇرگىزگەن. جيىن بارىسىندا ۋكراينا پرەزيدەنتى ۆلاديمير زەلەنسكي، گەرمانيا كانتسلەرى فريدريح مەرتس، ۇلىبريتانيا پرەمەرى كير ستارمەر، پولشا پرەمەرى دونالد تۋسك جانە فرانتسيا پرەزيدەنتى ەممانۋەل ماكرون اقش پرەزيدەنتى دونالد ترامپپەن تەلەفون ارقىلى سويلەسكەن بولاتىن.
ۇقساس جاڭالىقتار
