اقتاۋ قالاسىندا كينوتەاتردان شىققان وقۋشىعا شابۋىل جاسالىپ، ونىڭ ءبىر كوزىنە پنەۆماتيكالىق قارۋدان وق تيگەن، دەپ حابارلايدى “ادىرنا” ۇلتتىق پورتالى الماتى تەلەارناسىنا سىلتەپ.
سالدارىنان بوزبالا كورۋ قابىلەتىنەن ايىرىلىپ، بولاشاق ماماندىعىنان باس تارتۋعا ءماجبۇر بولعان.
جابىرلەنۋشى – 11-سىنىپ وقۋشىسى. ونىڭ ايتۋىنشا، دوسىمەن بىرگە كينوتەاتردان شىققاندا 5-10 ادام تاپ بەرگەن.
«سول ءسات ەسىمدە جوق، ءبارى تۇمان سەكىلدى. قازىر تەك ءبىر كوزىممەن عانا كورەمىن»، – دەيدى ءجاسوسپىرىم.دارىگەرلەر بىرنەشە وتا جاساعانىمەن، ول ۇشقىش بولۋ ارمانىنان ايىرىلدى. اناسى مادينا رىسماعانبەتوۆا بالاسىنىڭ اۋىر جاراقات العانىن، باستاپقىدا كوزگە تۇسكەن وقتى بىردەن انىقتاۋ مۇمكىن بولماعانىن ايتتى. پوليتسيا دەرەگىنشە، ءىس باستاپقىدا قىلمىستىق كودەكستىڭ 99-بابى («كىسى ولتىرۋگە وقتالۋ») بويىنشا تىركەلىپ، كەيىن 106-باپقا («دەنساۋلىققا قاساقانا اۋىر زيان كەلتىرۋ») اۋىستىرىلعان. كۇدىكتى – كامەلەتكە تولماعان ءجاسوسپىرىم. ول تەرگەۋ كەزىندە قالادان شىقپاۋ تۋرالى قولحاتپەن بوساتىلعان. جابىرلەنۋشىنىڭ وتباسى كىنالىگە قاتاڭ جازا بەرىلىپ، ادىلەت سالتانات قۇرۋىن تالاپ ەتۋدە.
«ۇلىمنىڭ تاعدىرىنا جاۋاپتى ادامدار جازاسىز قالماۋى ءتيىس»، – دەدى اناسى.
ۇقساس جاڭالىقتار
