اتاۋلى الەۋمەتتىك كومەك الۋشىلاردىڭ سانى 2 ەسەگە جۋىق قىسقارۋى مۇمكىن. بۇل تۋرالى بۇگىن ورتالىق كوممۋنيكاتسيالار قىزمەتىندەگى ءباسپاسوز ءماسليحاتىندا قر ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ ءمالىم ەتتى، دەپ حابارلايدى قازاقپارات ءتىلشىسى.
«بۇگىندە اتاۋلى الەۋمەتتىك كومەكتى 306 مىڭ وتباسى نەمەسە شامامەن 1,6 ميلليون ادام الادى. ءبىزدىڭ بولجامىمىزشا، ااك الۋشىلاردىڭ سانى قىسقارۋى مۇمكىن. بىراق، شامامەن 900 مىڭ ادام بۇل كومەك ءتۇرىن الادى دەپ ويلايمىز»، - دەدى مينيستر.
ونىڭ اتاپ وتۋىنشە، كوپبالالى وتباسىنىڭ تابىسى مەملەكەت تاراپىنان بەرىلەتىن جاردەماقىنى قوسقان كەزدە دە كەدەيشىلىك شەگىنەن جوعارى بولماسا، وندا مۇنداي وتباسىعا جاردەماقىعا قوسا ااك-تە بەرىلەدى. وسى رەتتە مينيستر مەملەكەت مۇنداي قادامعا نەلىكتەن بارىپ وتىرعاندىعىن ءتۇسىندىرىپ ءوتتى.
«مىناداي جاعداي بار. ەكى وتباسى دا دا بەس بەستەن بالا بار. ءبىر وتباسى از قامتىلعاندار ساناتىنا ىلىكسە، ەكىنشىسى كىرىسىنىڭ نەبارى 400-500 تەڭگەگە اسىپ كەتۋىنە بايلانىستى ىلىگە الماي قالدى. مۇنداي جاعدايدا ول وتباسى ااك الا المايدى. بىراق، ءبىز ەكى وتباسىنىڭ دا ومىرلىك جاعدايلارى بىردەي ەكەندىگىن تۇسىنەمىز. سوندىقتان ااك رەتىندە تولەپ وتىرعان تولەمدەردىڭ ءبىر بولىگىن وتباسى كىرىسىنە قاراماستان تاعايىندالاتىن جاردەماقىعا اۋىستىرۋ تۋرالى شەشىم قابىلدادىق»، - دەدى ءبىرجان نۇرىمبەتوۆ.
