بقو-دا حالىقارالىق وتباسى كۇنىنە وراي سالتاناتتى شارا ءوتتى

باتىس قازاقستان وبلىسى قوعامدىق دامۋ باسقارماسىنىڭ مەملەكەتتىك الەۋمەتتىك تاپسىرىسى اياسىندا «اق وتاۋ» وتباسى ورتالىعى» قوعامدىق بىرلەستىگى وتباسىلىق قۇندىلىقتاردى ناسيحاتتاۋعا ارنالعان ۇلكەن شارا وتكىزدى. كەزدەسۋدىڭ ماقساتى: وتباسىلىق قۇندىلىقتاردىڭ ماڭىزدىلىعىن كورسەتۋ،ۇلگىلى وتباسىلاردى قولداۋ جانە ىنتالاندىرۋ، وتباسىلىق تاجىريبە الماسۋ،وتباسىلىق قاتىناستاردى تاربيەلەۋ جانە نىعايتۋ. جيىنعا ءار ءتۇرلى ۇلت وكىلىنەن قۇرالعان وتباسىلار شاقىرىلعان. ولاردىڭ قاتارىندا قاراپايىم ەڭبەك جولىندا جۇرگەن وتباسىلار دا بار. شارا بارىسىندا بىرنەشە جىلدان بەرى بىرگە قول ۇستاسىپ ءومىر ءسۇرىپ، بالا-شاعا مەن نەمەرە-شوبەرەنىڭ قىزىعىن كورىپ وتىرعان جانۇيالار الدىندا ءسوز العان بقو قدب باسشىسىنىڭ ورىنباسارى گۇلجانار شوكەەۆا بقو اكىمى ناريمان تورەعاليەۆتىڭ قۇتتىقتاۋىن جەتكىزدى. كەزدەسۋدە ءار وتباسى وزدەرىن تانىستىرىپ، قازاق حالقىنىڭ وتباسىلىق داستۇرلەرى مەن قۇندىلىقتارىن ساقتاۋدىڭ ماڭىزدىلىعىنا توقتالىپ، ءوز ومىرلىك تاجىريبەلەرىمەن ءبولىسىپ، وتباسىلىق بىرلىكتىڭ ماڭىزىن ەرەكشە اتاپ كورسەتتى. سالتاناتتى جيىن سوڭىندا ءار وتباسىعا ەرەكشە قۇرمەت كورسەتىلىپ، سىيلىقتار تابىستالدى.