جان-جاقتان سۇراتىپ ءجۇرىپ، وتكەندەگى ۆيدەونىڭ قالعان ۇزىكتەرى دە قولعا ءتۇسىپ جاتىر.
شاشىلعان اينانىڭ سىنىعىنداي باسقالارى تابىلىپ جاتسا، ونى دا شىعارارمىن، بۇيىرتسا.
اللانىڭ ءامىرى سولاي، قازىر الەمدى اقپارات بيلەپ تۇر. بيلەگەنى سونداي دۇنيەجۇزىلىك ساياسات پەن قاراشا ءۇيىڭنىڭ قارىم-قاتىناسىنا دەيىن دەگەنىن جاساپ-اق جاتىر. بىرەۋدى جاقسى كورىپ، جەك كورۋىڭە دەيىن جۇرەكتىڭ قالاۋى ەمەس، جەلىنىڭ قالاۋى قاتتىراق اسەر ەتەدى.
ونى نە ءۇشىن ايتىپ جاتىرمىن. بىرنەشە كۇن بۇرىن تاراعان مەنىڭ ۆيدەو-كەسىندىلەرىم جايلى...
تىڭداعان جۇرت ءارتۇرلى پىكىر ءبىلدىردى. سونىڭ ىشىندە ءدىندار، ۇستاز، وقىعان باۋىرلارىم دا بار. ءۇيىرىپ سوققان اقپارات داۋىلى، قايرات جولدىبايۇلى سەكىلدى بيازى باۋىرىمدى دا ورتاعا الىپ شىقتى. اشۋعا مىنگىزىپ، اشىنا سويلەتىپ، ءبىراز ارتىق-كەم ءسوز جازعىزدى. قايرات كىم!
ول - مەن ناماز وقيتىن مەشىتتىڭ يمامى. مەن ونىڭ جۇما سايىن ارتىندا تۇرعان جاماعاتىنىڭ ءبىرىمىن. مەنىڭ قۇلاعىمدا بايسالدى يمامنىڭ قوڭىر داۋسى، كوز الدىمدا جۇمساق جىميعان بەينەسى عانا...
اقپارات-فيتناسىنىڭ قيىندىعى سونداي، مەشىتتە بارشامىزعا سابىردى ۋاعىزداپ، سالقىنقاندىلىقتى ناسيxاتتاپ جۇرگەن يمام باۋىرىمىزدىڭ ءوزىن ەموتسياعا ۇرىندىرىپ، بەبەۋلەتىپ جىبەردى.
راسىندا، كورگەن ۆيدەوڭدا، مەككەنىڭ جاعدايىن مىسالعا كەلتىرە وتىرىپ، "ول جەردە جامباسقا تەپكەن", "الەم عۇلامالارىنىڭ ءبارى ءپاتۋا بەرگەن", "پوليتسيا، سەن پريكازدى ورىندا!" دەپ جاتسا، يمام تۇگىلى، ءمۇپتيدىڭ ءوزى سەلك ەتە قالۋى مۇمكىن عوي...
ول جەردە سەنىڭ ءدىني مامان ەمەس، قوعام قايراتكەرى، پاتريوتتىقتى تۋ ەتكەن اقىن رەتىندە اقتارىلىپ جاتقانىڭدى كىم ۇقسىن؟!
قولدان قيىستىرىپ، تاڭداپ جاسالىپ، تارقالعان ۆيدەونىڭ دا نەگىزگى ماقساتى سول ەدى، تارقاتۋشىلاردىڭ ارمانى دا سول ەدى. ويداعىسى ورىندالدى.
قوعام قاق ءبولىندى. تۇسىنە قارايتىندار مەن تۇسىنگىسى كەلمەيتىندەر بوپ ەكىگە ءبولىندى. بىرەۋ مۇxامەدجانعا سەنگىسى كەلەدى، بىرەۋ قايراتتى قولداپ بايەك بولۋدا.
اقپاراتتىق ارانداتۋ مەن يدەولوگيالىق ىرىتكى دەگەن وسى. راسىندا وسى ۆيدەونى مەن ءوزىم تاراتىپ، نەمەسە، وسىعان ۇقساس وسپادار ناسيxاتتى جالپىعا نەمەسە قۇزىرلى ورىندارعا ايتىپ جاتسام، قالاي ايىپتالسام دا ارمانىم بولماس ەدى. اششى اقپارات ىشقىنتىپ الدىعا شىعارماسا، يمام باۋىرىمىز "اتەيستپىن" دەپ جۇرگەن ابليازوۆپەن، ءدىن مەن ءدىن ادامدارىن كۇندە مازاق قىپ جۇرگەن تانىمال بلوگەرلەرمەن ءبىر ساپتا تۇرىپ،
ءوز جاماعاتىنىڭ "ايىبىن" اشىپ، ءوز دوسىنىڭ جاعاسىنان تارتار ما ەدى؟ ارينە، ويتپەس ەدى.
اقپارات اشىندىرماسا، جەكەگە شىعىپ، ءجونىن سۇرار ەدى عوي.
"بۇل نە، ءبىر جاقتى ناسيxات؟" دەپ، اقيقاتىن بىلەر ەدى عوي. "راxماننىڭ قۇلدارى" دەگەن ءبىر چاتتا وتىرمىز، جاھانعا جاريا ايتپاس بۇرىن، جاقىن جەردەن جاۋابىن وپ-وڭاي الار ەدى عوي.
اقپاراتتىق كيللەرلەردىڭ كىرىسكەن جەرىن قاراساڭىزشى.
ايتپەسە، ەكى مۇسىلماننىڭ ەگەسىپ جاتقانى، ەشكىمگە پايدا ەمەس ەكەنىن، بۇل كىسىدەن ارتىق بىلەر، قازاقستان رۋxانياتىندا كىم بار ەدى؟
مەنىڭ ايتپاعىم، اقپارات ءداۋىرى دەگەن قازىر وسىنداي.
ءجاي ادام تۇگىلى، قۇداي ءىلىمىن يگەرگەن، ءار قىلىعى وزگەگە ۇلگى بولاتىن، ءار ءسوزى ءۇشىن قيامەتتە سۇرالاتىنىن بىلەتىن، ءدىندار-تاقۋالاردىڭ ءوزىن، ىزبارلى بەينەگە، ىزاقور كەيىپكە تۇسىرەدى.
ارنايى جاسالعان ۆيدەوعا يلانىپ قالماسا، ء"دىن سۇيكىمسىز كورىنەتىن بولدى-اۋ" دەگەن جاناشىرلىعىمەن جانۇشىرا اسىعىس پوست جازباس ەدى عوي. ايتپەسە، جۋرناليستكە بەرگەن ءار سۇقباتىن جەكە ديكتوفونىنا قوسا جازاتىن قۇرمەتتى قايرات باۋىرىم، بىرەۋدەن كەلگەن اقپاراتتىڭ ارتىن تەكسەرۋ كەرەك ەكەنىن جاقسى بىلەدى عوي.
ءشاي دەسكەن جەرىمىز جوق، ول ۇيدەگى كەلىننىڭ قولىنان مەن اس ءىشىپ، ءبىزدىڭ ۇيدەن قايرەكەڭ ءدام تاتىپ جۇرگەن كۇندەر كەشە عانا ەمەس پە ەدى...
ءدىني باسقارما مەن كوميتەت وتىرىستارىندا ماڭىزدى ماسەلەلەردى بىرگە تالقىلاپ، قاتار وتىرعان ساتتەرىمىز قالاي ەستەن شىقسىن...
نايزاعايداي اقپاراتتىڭ جارق ەتە قالعانداعى جامان جەرى دە وسىندا.
الدى-ارتىڭدى ويلاتپاي، ۇرانداتىپ جىبەرەدى.
ايتپەسە كەز-كەلگەن اقپاراتتىڭ ارتىن كۇتىپ، سىرىن تەكسەرۋدى بىزگە تالماي ۇيرەتكەن يمام باۋىرلارىمىزدىڭ ءوزى ەمەس پە ەدى؟!
قازىرگى ۋاقىتتا، الدى-ارتىمىزدى وراعان اقپارات، اتا-انامىزدان اسەرلى، جۇبايىمىزدان دا جاقىن بوپ بارا جاتىر.
قوعام بوپ سوتتاپ جاتقان پەدوفيلدى بوقتاماۋىز مۇمكىن، بىراق، اقپاراتتىڭ اسەرىنەن كەشە عانا ءتانتى بوپ وتىرعان تۇلعانى بۇگىن ويلانباستان قارعاپ وتىرۋىمىز مۇمكىن.
اقپارات الاڭى - قىپ-قىزىل سوعىس مايدانى. اقپارات ارقىلى يدەولوگيالىق سوعىس ءجۇرىپ جاتىر.
مىقتى بولساڭ جاقسىلىعىن يگەرەسىڭ، ءالسىز بولساڭ، جاماندىعىنا يلەنەسىڭ. تەxنولوگيا دامىپ، اقپارات الۋ جىلدامداعاننىڭ ارقاسىندا 100 جىل بۇرىن ءبىر كىسىنىڭ 40 جىلدا تىرنەكتەپ جينايتىن ءبىلىمىن، قازىر 4 جىلدا يگەرەتىن مۇمكىنشىلىككە يە بولدىق. ينتەرنەت ارقىلى ساۋدا جىلدامداپ، بايلانىس ۇدەدى...
كەرىسىنشە، اقپاراتتىق جارنامانىڭ اسەرىنەن عىلىم ەگەلەرى مەن مايتالمان ەڭبەك ادامدارى تاسادا قالىپ، شوۋ بيزنەس پەن توي بيزنەس وكىلدەرى قوعامنىڭ الدىنا شىقتى. مۇعالىمنىڭ ايلىعى مەن تامادانىڭ تابىسى ون ەسە ايىرماشىلىققا جەتتى. ماتەماتيك جۇمادىلداەۆتىڭ ءبىر ءدارىسىن تىڭداماعان ۇرپاق، توبەلەسكىش ءحابيبتىڭ ءار جەكپە-جەگىن جاتقا بىلەتىن جاعدايعا جەتتى. جارنامانىڭ جەتەكتەۋىمەن جىرتىق شالباردى قۋانا كيىپ، ومىراۋىن جاپقانعا وقىرانا قارايتىن بولدىق. كينوتەاتردان شىققان سايىن قول ۇستاسقان ەركەكتەردى بايقاماعان بوپ، سۇيىسكەن قىزدارعا سويلەۋدەن قالدىق.
الەۋمەتتىك جەلىنى اۋليەدەي كورەمىز. كۇنىنە جۇزدەگەن اقپارات كەلەدى. جۇرەگىڭدى ءجۇز جاققا سۇيرەيدى. كەيبىرى ەسكىرگەن اقپارات، كوبىسى وتىرىك بوپ شىعادى. اقىرىندا، سىعىلعان جۇرەك، شارشاعان مي، توزعان جۇيكە ءۇشىن كىم جاۋاپ بەرەدى؟ ەشكىم دە...
سەبەبى، زامان سونداي، ۋاقىت ءۇردىسى وسىلاي...
امان قالۋ ءۇشىن، جۇرەكتە ءادىل تارازى بولماسا، رۋxاني سۇزگى، يماني يمۋنيتەت بولماسا، شارشاعانىمىز شارشاعان، شاتاسقانىمىز شاتاسقان...
مۇحامەدجان تازابەكتىڭ فەيزبۋك پاراقشاسىنان
