جۋرناليست، قوعام بەلسەندىسى مۇحتار تۇمەنباي تانىمال تەلەجۋرناليست مايا بەكباەۆاعا شۇيلىكتى، دەپ حابارلايدى «ادىرنا» ءتىلشىسى.
ايتۋىنشا، بەكباەۆا ءوز بەينەجازبالارىنىڭ بىرىندە قازاق ايەلدەرىن كەمسىتكەن.
«مەن نە كورىپ وتىرمىن ءوزى؟ بۇل نە سۇمدىق، مايا بەكباەۆا؟ بىلمەيتىندەر ءۇشىن وقيعانىڭ ءمان-جايىن ايتىپ بەرەيىن. مادام مايا الاشورداشىلاردىڭ ءبىر بولىگى نە سەبەپتى ورىس ايەلىنە ۇيلەنگەنى تۋرالى ۆيدەو ءتۇسىرىپتى. قىزدارعا ەمەس، ايەلدەرگە دەيدى. ءوزىن جۋرناليست سانايتىن بەكباەۆا، «سول تۇستاعى قازاق ايەلى ورىس ايەلدەرىمەن سالىستىرعاندا باسەكەگە قابىلەتسىز بولعان، تالاپقا ساي كەلمەگەن. الاشتىقتار وزىنە تەڭ كەلەتىن جار ىزدەدى…» دەپ وتىر. مۇنى قازاقستاندا اتاپ وتىلەتىن «انالار كۇنى» قارساڭىندا ايتقان. وسى سوزىڭمەن قاسيەتتى قازاق اناسىنىڭ اتىنا كىر كەلتىرىپ وتىرعانىڭدى بىلەسىڭ بە؟ قازاق دالاسىنا باتىر، بي، حان سىيلاعان انالارىمىزدىڭ ۇرپاعىنا بۇلايشا ءتىل تيگىزۋگە ساعان كىم قۇقىق بەردى؟» – دەدى ول.
ال مايا بەكباەۆا جۋرناليستكە بەرگەن جاۋابىندا بۇل ايىپتاۋلاردى جوققا شىعاردى.
«الاش كوسەمدەرىنىڭ تاڭداعان ايەلدەرى تۋرالى سول شىعارىلىمدا، ايتا كەتەيىن، بۇل بىرنەشە جىل بۇرىن جاريالانعان، سىزدەر سونشالىق اشۋلاناتىنداي سوزدەر ايتىلمادى. بۇل – قازىرگى قازاق قىزدارىنا، ولاردىڭ اتا-انالارىنا، اكەلەرىنە، اعالارىنا، كۇيەۋلەرىنە ارنالعان ۇندەۋىم ەدى. ءبىزدىڭ قوعامداعى قىز-كەلىنشەكتەرگە دەگەن سەكسيستىك جانە كەمسىتۋشى كوزقاراس – شىنايى ماسەلە. ماعان ارنالعان ءسىزدىڭ جازباڭىز – سونىڭ دالەلى. قازاق ايەلى ازاپ شەگىپ، قۇرمەتكە، وزىنە دەگەن تەڭ قۇقىق پەن مۇمكىندىكتەرگە لايىق. ءبىلىم الىپ، مانساپ قۇرۋعا، ماحابباتپەن تۇرمىس قۇرۋعا قۇقىعى بار. قازاق ايەلى مۇنداي قارىم-قاتىناسقا ەندى توزبەيدى. ءسىزدىڭ مەنى وسىلاي كەمسىتۋگە قانداي قۇقىعىڭىز بار؟ ءسىزدى كىم وسىلاي تاربيەلەدى؟
ءسىز تۋرالى اقپارات وتە از، ءسىزدى كوپشىلىك بىلمەيدى. بىراق اتىڭىز تانىمال. ءسىزدى مۇحتار اۋەزوۆتىڭ قۇرمەتىنە اتاعان شىعار. مۇحتار ومارحانۇلىنىڭ ىزىنەن وسى ەسىمدى يەلەنگەن كوپتەگەن ابىرويلى ازاماتتار ءوتتى. بىراق سىزگە قاراپ، مەنىڭ ەسىمە مۇلدە باسقا مۇحتار تۇسەدى»،— دەپ جازدى بەكباەۆا.
