قازاقستانداعى اسكەريلەر وزدەرىن وزگەلەردەن ەرەكشەلەپ جۇرەتىن بەس جۇلدىزدى العاش بەدەرلەگەن ءوز اتا-بابالارى ەكەنىن بىلە مە ەكەن؟ ءاي، قايدام… دەگەنمەن، وتە ەجەلدەن اسپان سىرىنا قانىق بابالارىمىزدىڭ بۇل ونەرتاپقىشتىعىنا قايران قالۋعا دا بولمايدى.
شىعىس قازاقستانداعى شىلىكتى قورعانىنان التىن بەسجۇلدىز ۇلگىسىندەگى تۇيمە تابىلعاندا جۇمعان اۋزىمىزدى اشپاعان ەدىك. شىلىكتىنىڭ وڭتۇستىك-باتىسىندا تارباعاتاي، شىعىسىندا ساۋىر-سايحان جانە سولتۇستىگىندە ماڭراق تاۋلارىمەن قورشالعان ۇلكەن الىپتا تىزىلگەن قورعاندار تىزبەگىنەن تۇرادى. الگى قابىرحانادان التىن بۇيىمدار ءار جەردەن، ءار قاباتتان كەزدەسە باستاعان. بۇل جاپسىرمالار سوم التىننان قۇيىلعان اشەكەي دۇنيەلەر، ياعني تازا قۇيما التىندار. ولاردىڭ ىشىندەگى ەڭ ۇلكەنى – ارقاردىڭ ءمۇسىنى. سونداي-اق ەكى بۇعىنىڭ ءمۇيىزى ايقاسىپ تۇرعانىن بەينەلەيتىن التىن جاپسىرما “ماڭگى الەم بايتەرەگى” ورنەگىن ەسكە تۇسىرەدى. “ال ءبىر-بىرىمەن تۇمسىق ءتۇيىستىرىپ تۇرعان ەكى تاۋتەكەنىڭ باسى كەيپىندە جاسالعان جاپسىرمادان ءۇش سيۋجەتتى كورۋگە بولادى. ونىڭ ءبىرىنشىسى، قوس تاۋتەكەنىڭ باسى دەسەك، ەكىنشىسى، تۋرا قاراپ تۇرعان بارىستىڭ بەينەسى. ءۇشىنشىسى، وسى جاپسىرمانى جاتقىزىپ قويىپ قىرىنان قاراعاندا، ونىڭ ۇشىپ بارا جاتقان قۇسقا ۇقسايتىندىعى. بۇل ناعىز ونەر شىڭى.
اسا ءبىر گەومەتريالىق دالدىكپەن جاسالعان بەسجۇلدىز بەينەلى تۇيمە دە ەرىكسىز تاڭداندىرادى. بەس جۇلدىزدىڭ قىرلارى مەن تۇيمەنىڭ جيەكتەرى جىڭىشكە التىنمەن كومكەرىلگەن. سىرتى دا تۇگەل التىن. تۇيمەنىڭ ورتاسىنداعى جۇلدىزشانىڭ ءوزى كوك تۇنىكەدەن (ەمالدان), جۇلدىزشانىڭ شەتى اق تۇنىكەدەن تۇرادى. سونداي-اق، بەسجۇلدىز ساقتاردا پاتشا بيلىگىنىڭ بەلگىسى بولعاندىعى جونىندە دە قوسىمشا دەرەكتەر بار. بۇگىندە بۇكىل جاھان اسكەري بەلگى رەتىندە پايدالاناتىن بەسجۇلدىزدىڭ – اتاسى قازاقتار ەكەنىن نەگە بىلمەيمىز.
ساعىن سەرىك
