9 مامىردا الماتىدا قالا اكىمدىگىنىڭ قولداۋىمەن ارداگەرلەر بىرلەستىكتەرى ۇيىمداستىرعان «باتىرلارعا تاعزىم» اتتى ەستەلىك اكتسياسى ءوتتى.
شارا ۇلى جەڭىستىڭ 80 جىلدىعىن مەرەكەلەۋ اياسىنداعى ماڭىزدى وقيعا رەتىندە قالا تۇرعىندارىن بىرىكتىرىپ، سوعىسقا قاتىسقان باتىرلارىمىزعا، تىل ەڭبەككەرلەرىنە جانە جەڭىسكە ولشەۋسىز ۇلەس قوسقان بارلىق ەرجۇرەك ازاماتتارعا قۇرمەت بىلدىرۋگە مۇمكىندىك بەردى.
«باتىرلارعا تاعزىم» اكتسياسىنا قاتىسۋشىلار شەرۋىن اسكەري ۇرمەلى وركەستر، قۇرمەت قاراۋىلىنىڭ روتاسى مەن ارداگەرلەر ۇيىمدارىنىڭ وكىلدەرى باستاپ شىقتى.
ارداگەرلەردىڭ قوعامدىق بىرلەستىكتەرى اتىنان اكتسيانى ۇيىمداستىرۋشىلاردىڭ ءبىرى، قازاقستان رەسپۋبليكاسى گەنەرالدار كەڭەسىنىڭ توراعاسى، گەنەرال-لەيتەنانت سارسەكوۆ بەكسۇلتان سارسەكۇلى ۇرپاقتار ساباقتاستىعىنىڭ ماڭىزدىلىعىنا ەرەكشە توقتالدى:
«بارىمىزگە بەلگىلى، بيىل ۇلى وتان سوعىسىنداعى جەڭىستىڭ 80 جىلدىعى اتالىپ وتۋدە. بۇل سوعىستا قازاقستان زور ۇلەس قوستى. مايدانعا ءبىر ميلليون ەكى ءجۇز مىڭنان استام جاۋىنگەرىمىز – اتالارىمىز، اكەلەرىمىز اتتاندى. ولاردىڭ تەك 600 مىڭى عانا ەلگە ورالدى».
«بۇگىنگى ۇرپاق ءۇشىن ازاتتىق پەن جەڭىس جولىندا، بۇگىنگى جارقىن ءارى تاۋەلسىز قازاقستاندا ءومىر ءسۇرۋىمىز ءۇشىن جانىن قيعان ەرلەردى ۇمىتپاۋ – قاسيەتتى پارىز. ءبىز بۇل ازاماتتاردى ءاردايىم جادىمىزدا ساقتاۋىمىز كەرەك»، – دەدى ول.
اكتسيا مارشرۋتى گوگول كوشەسىنىڭ بويىمەن ورتالىق مادەنيەت جانە دەمالىس پاركىنەن باستاپ، 28 گۆاردياشى-پانفيلوۆشىلار اتىنداعى ساياباققا دەيىن جالعاستى. شارا ماڭگىلىك الاۋ جانىنداعى داڭق مەموريالىنا گۇل شوقتارىن قويۋمەن اياقتالدى. بۇل ساتتە وركەستردىڭ سۇيەمەلدەۋىمەن اسكەري اۋەندەر ورىندالدى. اكتسياعا 30 مىڭنان استام الماتىلىق قاتىستى.
اكتسياعا قاتىسۋشىلاردىڭ ءبىرى، الماتىلىق تۇرعىن – گاۋحار ءجۇسىپوۆا، مايدانگەر بولعان اتاسىنىڭ پورترەتىن ۇستاپ كەلىپ، ونىڭ ەرلىككە تولى ءومىرى مەن وتباسى جادىنداعى تاريحىمەن ءبولىستى:
«مەنىڭ اتام تىلەپوۆ كالەل تىلەپۇلى 1914 جىلى سەمەي وبلىسىنداعى شالاباي اۋىلىندا دۇنيەگە كەلگەن. سوعىس باستالعاندا ول 39-تانك بريگاداسى قۇرامىندا، موتورلى اۆتوماتشىلار باتالونىنىڭ 1-روتاسىندا اۆتوماتشى بولىپ قىزمەت ەتتى. ونىڭ اسكەري جولى سەۆاستوپولدەن باستالىپ، ۆولگوگراد پەن دنەپر ارقىلى ءوتىپ، 1945 جىلى بۋداپەشتكە دەيىن جەتتى. كورسەتكەن ەرلىگى ءۇشىن بابام «ەرلىگى ءۇشىن» مەدالىمەن ماراپاتتالعان.
ءبىز – بالا-شاعاسى، نەمەرە-شوبەرەلەرى، اتامىزدىڭ ەرلىگىن ماقتان تۇتامىز. «باتىرلارعا تاعزىم» اكتسياسىنا قاتىسۋ ارقىلى ونىڭ رۋحىنا، سونداي-اق بەيبىت ءومىر سىيلاعان بارلىق ارداگەرلەرگە قۇرمەتىمىزدى بىلدىرەمىز».
جەڭىمپازدار ۇرپاعىنا دەگەن ماقتانىش پەن بىرلىك سەزىمىن
80 جىلدىق مەرەيتويلىق سيمۆوليكامەن جانە ۇلتتىق ورنەكپەن بەزەندىرىلگەن «باتىرلارعا تاعزىم!» دەگەن جازۋى بار 10 تاقىرىپتىق باننەر ايرىقشا اسەرمەن تولىقتىردى.
كولوننالاردى بەزەندىرۋ بارىسىندا 500 مەملەكەتتىك تۋ قولدانىلىپ، قاتىسۋشىلارعا 10 مىڭ دانا قازاقستان تۋى مەن 20 مىڭ «جەڭىس لەنتاسى» تاراتىلدى. ءىس-شارانى ۇيىمداستىرۋعا 500 ەرىكتى جۇمىلدىرىلدى. جاستاردىڭ 14×7 مەتر كولەمىندەگى الىپ مەملەكەتتىك تۋدى كوتەرىپ ءوتۋى اكتسيانىڭ جارقىن ساتتەرىنىڭ ءبىرى بولدى.
جەڭىس تۋرالى ەستەلىك – بۇل تەك تاريح قانا ەمەس، قازىرگى مەن بولاشاققا ارنالعان ادامگەرشىلىك باعدار. «باتىرلارعا تاعزىم» اكتسياسى قازاقستاندىق باتىرلاردىڭ ەرلىگى ۇرپاق جادىندا ماڭگى ساقتالاتىنىن تاعى ءبىر دالەلدەدى.
