تەلەجۇرگىزۋشى مايا بەكباەۆا جەلىدەگى پاراقشاسىندا پرەزيدەنتكە ۇندەۋ جاساپ، ۇلت قازىناسى قانىش ساتباەۆقا "حالىق قاھارمانى" اتاعىن بەرۋدى ۇسىندى، دەپ حابارلايدى "ادىرنا" ۇلتتىق پورتالى Zakon.kz-كە سىلتەپ.
ونىڭ ايتۋىنشا، قانىش ساتباەۆ تەك عالىم ەمەس، ول – سوعىس جىلدارىندا كسرو-نى شيكىزاتپەن قامتاماسىز ەتۋ ارقىلى جەڭىسكە ۇلەس قوسقان ستراتەگ. ونىڭ ەڭبەگى – تەك عىلىمداعى جەتىستىك ەمەس، ۇلتتىق قاۋىپسىزدىك پەن مەملەكەتكە قىزمەت ەتۋدىڭ جارقىن ۇلگىسى ەكەنىن اتاپ ءوتتى.
"بۇگىن مەن سەناتور، اكادەميك ءارى عالىم التىنبەك نۇحۇلىمەن بىرگە قازاقستان رەسپۋبليكاسىنىڭ پرەزيدەنتىنىڭ اتىنا قانىش يمانتايۇلى ساتباەۆقا «حالىق قاھارمانى» اتاعىن بەرۋ تۋرالى وتىنىشپەن بىرلەسكەن حاتقا قول قويدىق.
ۇلى جەڭىستىڭ 80 جىلدىعى قارساڭىندا، قازاقستان مەن قازاق حالقىنىڭ بۇل جەڭىسكە قوسقان ۇلەسىن ەسكە الا وتىرىپ، قازاق عىلىمىنىڭ نەگىزىن قالاعان كورنەكتى عالىم قانىش ساتباەۆتىڭ ەسىمىن اتاماي كەتۋ مۇمكىن ەمەس. ونىڭ تەك قازاقستاننىڭ دامۋىنا عانا ەمەس، گيتلەرلىك گەرمانيامەن بولعان سوعىستا بۇكىل كەڭەس وداعىن قۇتقارۋعا، ونىڭ تۇپكىلىكتى جەڭىسىنە جانە فاشيزمنەن بۇكىل الەمدى امان الىپ قالۋعا قوسقان ۇلەسىن باعالاۋ قيىن. بۇل ماراپات پەن مويىنداۋ ساتباەۆتىڭ وزىنە ەمەس — ءبىزدىڭ قوعامعا، قازاقستاندىق جاستارعا جانە بولاشاق ۇرپاققا قاجەت. ولار ءبىلۋى، ەستە ساقتاۋى جانە سەنۋى ءتيىس: ناعىز پاتريوتيزم، وتانعا دەگەن ماحاببات، حالىق ءۇشىن ادال ەڭبەك، ادامگەرشىلىك، ادەپتىلىك پەن باتىرلىق قوعام مەن مەملەكەت تاراپىنان ارقاشان لايىقتى باعالانادى. قۇرمەتتى پرەزيدەنت قاسىم-جومارت كەمەلۇلى @tokayev_online, سىزدەن قازاقستاننىڭ جارقىن بولاشاعى ءۇشىن تاريحي ادىلەتتىلىكتى قالپىنا كەلتىرۋ اكتىسىن جۇزەگە اسىرۋىڭىزدى ازاماتتىق پارىزىم دەپ سۇرايمىن", - دەپ جازدى ول ءبىر كۇن بۇرىن.الايدا، بۇل ۇسىنىسقا قارسى پىكىر دە بار. جۋرناليست جارىلقاپ قالىباي بۇل باستامانى سىنعا الدى.
قانىش ساتباەۆ - قازاقتان شىققان تۇڭعىش اكادەميك-گەولوگ، قازاق سسر عىلىم اكادەمياسىنىڭ نەگىزىن قالاۋشى، تۇڭعىش پرەزيدەنتى، جەزقازعاننىڭ مول كەن قورىن دالەلدەپ، اۋىر ونەركاسىپتىڭ دامۋىنا جول اشقان. لەنين وردەنىنىڭ ءتورت دۇركىن يەگەرى، كسرو مەملەكەتتىك جانە لەنيندىك سىيلىقتارىنىڭ لاۋرەاتى بولدى.
