4 مامىر كۇنى الماتى وبلىسىنداعى الما-اراساندا سەرۋەندەۋگە شىققان ستۋدەنت قىزدى تاس باسىپ، ول العان اۋىر جاراقاتتارىنان وقيعا ورنىندا كوز جۇمعان، دەپ حابارلايدى "ادىرنا" ۇلتتىق پورتالى.
قازاقستان رەسپۋبليكاسى توتەنشە جاعدايلار مينيسترلىگىنىڭ مالىمەتىنشە، قايعىلى جاعداي تەڭىز دەڭگەيىنەن 2 500 مەتر بيىكتىكتە، سارقىراما ماڭىندا ورىن العان. تاۋعا كوتەرىلگەن توپتىڭ ىشىندە بولعان كۋاگەرلەر قىزدى ءوز كۇشتەرىمەن قۇتقارا الماعان.
«رەسپۋبليكالىق جەدەل-قۇتقارۋ جاساعىنىڭ قۇتقارۋشىلارىنا وقيعا تۋرالى حابار كۋاگەرلەردەن ءتۇستى. بەلگىلى بولعانداي، وقيعا ورنىندا ۇيالى بايلانىس بولماعان، سوندىقتان حابار تەك كۋاگەرلەر تاۋدان ءتۇسىپ كەلگەننەن كەيىن عانا بەرىلدى»، — دەپ حابارلادى مينيسترلىك.
قۇتقارۋ وپەراتسياسىنا رجقج-نىڭ 18 قۇتقارۋشىسى، 109 قىزمەتى، اپاتتىق مەديتسينا ورتالىعىنىڭ دارىگەرلەرى جانە ەكى كينولوگيالىق توپ جۇمىلدىرىلدى. قىزدىڭ دەنەسى گيدراۆليكالىق قۇرىلعىنىڭ كومەگىمەن شىعارىلىپ، پوليتسيا قىزمەتكەرلەرىنە تاپسىرىلدى.
مينيسترلىك وقيعا قارساڭىندا تاۋلى ايماقتاردا داۋىل تۋرالى ەسكەرتۋ جاريالانعانىن اتاپ ءوتتى. سوعان بايلانىستى ۆەدومستۆو ازاماتتاردى تاۋعا شىعاردا اۋا رايى بولجامىن مۇقيات باقىلاۋعا جانە قاۋىپسىزدىك شارالارىن قاتاڭ ساقتاۋعا شاقىردى.
ۇقساس جاڭالىقتار
