ءۇندىستان مەن پاكىستان اراسىنداعى اسكەري شيەلەنىس. ونداعان ادام قازا تاپتى

7 مامىرعا قاراعان ءتۇنى ءۇندىستان مەن پاكىستان اراسىنداعى زىمىران شابۋىلدارىنىڭ الماسۋى سالدارىنان ەكى تاراپتان ونداعان ادام قازا تاپتى، دەپ حابارلايدى “ادىرنا” ۇلتتىق پورتالى. اتاپ ايتقاندا، پاكىستان ءوزىنىڭ اۋماعىندا 26 بەيبىت تۇرعىننىڭ قازا تاۋىپ، تاعى 46 ادامنىڭ جارالانعانىن حابارلادى. ال ءۇندىستان 10 ادامنىڭ قازا تاۋىپ، 48 ادامنىڭ جارالانعانىن جەتكىزدى. ءۇندى ارمياسى «سيندۋر» وپەراتسياسىن جۇرگىزىپ، ونىڭ اياسىندا پاكىستان اۋماعىنا زىمىرانمەن سوققى بەردى. ءۇندى باق-تارى «سيندۋر» وپەراتسياسى بارىسىندا 12 «تەرروريستىڭ» جويىلعانىن حابارلادى. ال يسلاماباد رەسمي تۇردە باستاپقىدا سەگىز ادامنىڭ قازا تاپقانىن راستادى، بىراق ولاردى «تەرروريست» دەپ اتامادى. پاكىستاننىڭ پرەمەر-ءمينيسترى شاحباز شاريف ەلدىڭ اسكەري كۇشى ءۇندىستاننىڭ بەس جويعىش ۇشاعىن، ونىڭ ىشىندە فرانتسۋزدىق Rafale ۇشاقتارىن اتىپ تۇسىرگەندەرىن حابارلادى. بۇدان سوڭ پاكىستان راكەتالار مەن ارتيللەريانى قولدانىپ، قارسى سوققى جاساعانى بەلگىلى بولدى. كەيىنىرەك پاكىستان قورعانىس مينيسترلىگى مالىمدەمە جاساپ، ەگەر نيۋ-دەلي شەگىنسە، يسلاماباد ۇندىستانعا قارسى اسكەري ارەكەتتەردى توقتاتۋعا دايىن ەكەنىن مالىمدەدى. بۇل وقيعا دەليدىڭ پاكىستاندى ءۇندىستان باقىلاۋىنداعى كاشميردە تۋريستەرگە جاسالعان شابۋىلعا قاتىسى بار سودىرلاردى قولدادى دەپ ايىپتاۋىنان ەكى اپتا وتكەن سوڭ ورىستەدى. سول شابۋىل كەزىندە 26 ادام قازا تاپقان. ولاردىڭ ءبارى ۇندىستاندىق ەكەنى ايتىلادى. پاكىستان بيلىگى بۇل ايىپتاۋلاردى جوققا شىعارعان.