ۇلى جەڭىستىڭ 80 جىلدىعى. توقاەۆ اسكەري پارادتا ارداگەرلەردى قۇتتىقتادى

قازاقستان پرەزيدەنتى قاسىم-جومارت توقاەۆ ۇلى جەڭىستىڭ 80 جىلدىعىنا ارنالعان اسكەري پارادتا حالىقتى قۇتتىقتاپ، ارداگەرلەرگە العىسىن ءبىلدىردى، دەپ حابارلايدى “ادىرنا” ۇلتتىق پورتالى. ول سوعىس جىلدارىنداعى قازاق حالقىنىڭ مايدان مەن تىلداعى ەرلىگىن ەرەكشە اتاپ ءوتتى. مەملەكەت باسشىسىنىڭ ايتۋىنشا، بۇل كۇن – قازاقستاندىق جاۋىنگەرلەردىڭ رۋحىن، باتىرلىعىن ەسكە تۇسىرەتىن قاسيەتتى مەرەكە. «ءبىز وتان ءۇشىن جانىن پيدا ەتكەن باتىر بابالارىمىزدىڭ ەرلىگىن ماڭگى ەستە ساقتايمىز»، – دەدى توقاەۆ. پرەزيدەنت قازاقستاننان 1,2 ميلليوننان استام ادامنىڭ مايدانعا اتتانىپ، ولاردىڭ جارتىسىنا جۋىعىنىڭ ءومىرى قيىلعانىن ايتتى. تىلدا قالعان حالىق ازىق-تۇلىك پەن كيىم-كەشەك جونەلتىپ، قىسقا مەرزىمدە اسكەري ءوندىرىس جولعا قويىلعانىن اتاپ ءوتتى. توقاەۆ قازاق حالقىنىڭ جاۋىنگەرلىك رۋحى – التىن وردا مەن قازاق حاندىعى داۋىرىنەن جالعاسىپ كەلە جاتقان ۇلى ءداستۇر ەكەنىن ەسكە سالدى. «ءبىزدىڭ قاھارمان ارميا – تاۋەلسىزدىگىمىزدىڭ تىرەگى. قازاقستاندىق ساربازدار مەملەكەتتىڭ تۇتاستىعىن، ەلدىڭ تىنىشتىعىن قورعاپ كەلەدى»، – دەدى ول. مەملەكەت باسشىسى حالىقارالىق بىتىمگەرشىلىك ميسسيالارعا قاتىسىپ جۇرگەن قازاقستاندىق جاۋىنگەرلەردىڭ كاسىبيلىگىن دە ەرەكشە اتاپ ءوتتى. سونىمەن قاتار، “باتىرلارعا تاعزىم” اكتسياسى اياسىندا ەلدە 500-گە جۋىق كوشەگە سوعىس ارداگەرلەرىنىڭ ەسىمى بەرىلەتىنى تۋرالى حابارلادى. «بەيبىتشىلىك – باعا جەتپەس قۇندىلىق. ءبىز سوعىستىڭ شىندىعىن ۇمىتپاۋىمىز كەرەك. بۇل – جاس ۇرپاقتىڭ ساناسىنا ءسىڭۋى ءتيىس تاريحي شىندىق»، – دەپ تۇيىندەدى توقاەۆ. ول ەل قورعانىسى مەن ارميانى جاڭعىرتۋ – مەملەكەتتىڭ باسىم باعىتتارىنىڭ ءبىرى ەكەنىن، ال وتاندى قورعاۋ – ءاربىر ازاماتتىڭ قاسيەتتى پارىزى ەكەنىن ەسكە سالدى.