قىلىش

1197

كەزىندە ايقاستاردا كەسۋ ارقىلى قولدانىلعان قارۋ – قىلىش. ەرتەرەكتە سەمسەردەپ اتالعان ونىڭ ەكى ءجۇزى، ءال ساپىنىڭ بىر ءجۇزى بولعان. قىلىش (سەمسەردىڭ، ساپىنىڭ) بولىكتەرى مىناداي: كەسەتىن تەمىرى – «بولاتى»، قولعا ۇستايتىن بولىگى –«سابى». ول اعاشتان، مۇيىزدەن جاسالىپ، ۇشى التىندالىپ، اسىل تاستارمەن اشەكەيلەنەدى. سابىنا قولعا ءىلىپ الۋ ءۇشىن تاعاتىن ءجىبى – «بۇلدىرگى». بۇلدىرگىنىڭ ۇشى كىشكەنتاي شاشاقپەن بىتەدى. قىلىشتىڭ (سەمسەردىڭ، ساپىنىڭ) ساپقا كىرگىزىلەتىن بولىگى – «جەتەسى». سابى مەن قىلىشتىڭ بولاتى تۇيىسكەن جەردە قولدى تىرەپ تۇراتىن تەمىرى – «بالداعى». قارۋدىڭ ماڭىزدى بولىگى بولعاندىقتان، بالداقتى التىنداپ، كۇمىستەپ، اسىل تاستارمەن اشەكەيلەگەن. ساق، سكيف، تۇركى، قىپشاقتاردىڭ ءار زاماندا قولدانعان ساپى، سەمسەر، قىلىشتارىنىڭ بالداقتارى ءار ءتۇرلى. قىلىشتىڭ بولاتىنىڭ ءتۇزۋ بولىگى — «القىمى»، كەسۋگە قولداناتىن بولىگى – «باسى»، كەسەتىن جەرى – «ۇشى». كەيبىر قىلىشتاردىڭ باسى اۋىر بولۋ ءۇشىن جالپايىڭقىراپ كەلىپ، سىرت جاعى شىعىڭقى بولادى. ونى «جالمانى» دەيدى.

 

پىكىرلەر