ماڭعىستاۋ وبلىسى مۇنايلى اۋدانىنا قاراستى بەسشوقى اۋىلىندا تۇرعىن ۇيلەردىڭ ءبىرىنىڭ تەرەزەسىنىڭ جانىنان جاڭا تۋعان ءسابي تابىلدى. ماڭعىستاۋ وبلىستىق پوليتسيا دەپارتامەنتى بۇل وقيعانى راستادى، دەپ حابارلايدى “ادىرنا” ۇلتتىق پورتالى.
Lada.kz اقپاراتىنا سۇيەنسەك، وقيعا 5 مامىردا تاڭعى ساعات 09:30 شاماسىندا ورىن العان. ءسابيدى العاش بولىپ جەرگىلىكتى تۇرعىن بايقاپ، دەرەۋ جەدەل قىزمەتتەرگە حابار بەرگەن.
قازىرگى ۋاقىتتا بالانىڭ اناسىن انىقتاۋ جانە ونىڭ قايدا ەكەنىن تابۋ ءۇشىن جەدەل-ىزدەستىرۋ شارالارى جۇرگىزىلىپ جاتىر.
"اتالعان دەرەك بويىنشا قىلمىستىق ءىس قوزعالدى. نارەستە پەرزەنتحاناعا جەتكىزىلدى، قازىرگى تاڭدا ونىڭ ءومىرى مەن دەنساۋلىعىنا ەش قاۋىپ جوق، – دەپ مالىمدەدى ۆەدومستۆونىڭ ءباسپاسوز قىزمەتى.
پوليتسيا وسى وقيعاعا قاتىستى قانداي دا ءبىر اقپارات بىلەتىن ازاماتتاردى جاقىن ماڭداعى بولىمشەگە جۇگىنۋگە نەمەسە سەنىم تەلەفونىنا حابارلاسۋعا شاقىرادى.
