الماتىداعى ورتالىق ستاديوندا ءوتۋى ءتيىس بولعان كانە ۋەستىڭ كونتسەرتى قاۋىپسىزدىك شارالارىنا بايلانىستى 15 تامىزعا اۋىستىرىلدى، دەپ حابارلايدى "ادىرنا".
كورەرمەندەر كونتسەرتتىڭ باستالۋىن ءبىراز ۋاقىت كۇتكەنىمەن، امەريكالىق رەپەر ساحناعا شىقپادى. ۇيىمداستىرۋشىلار كوپشىلىككە كونتسەرتتىڭ ەرتەڭ ءدال سول ۋاقىتتا وتەتىنىن حابارلادى. بۇعان دەيىن ساتىلعان بيلەتتەردىڭ ەرتەڭگى كونتسەرتكە جارامدى بولاتىنى ايتىلدى.
كونتسەرتتىڭ كەيىنگە شەگەرىلۋىنە الماتىدا بولعان اۋقىمدى ەلەكتر قۋاتىنىڭ ءوشۋى دە اسەر ەتتى. بۇگىن الماتى، الماتى وبلىسى جانە قازاقستاننىڭ بىرقاتار وڭىرىندە ەلەكتر جارىعى ءوشىپ، قالادا كولىك قوزعالىسى مەن ءتۇرلى نىسانداردىڭ جۇمىسىنا قيىندىقتار تۋىنداعان.
ەنەرگەتيكا مينيسترلىگىنىڭ مالىمەتىنشە، ەلەكتر قۋاتىنىڭ ۇزىلۋىنە ورتالىق ازيانىڭ ەنەرگوجۇيەسى تاراپىنان ەلەكتر ەنەرگياسى اعىنىنىڭ كۇرت وزگەرۋى سالدارىنان ەنەرگوجۇيەدە قۋات تاپشىلىعىنىڭ پايدا بولۋى سەبەپ بولعان.
ەلەكتر جارىعىنداعى اقاۋلارعا قاراماستان، ۇيىمداستىرۋشىلار كونتسەرتكە كەلگەن كورەرمەندەردى ستاديونعا كىرگىزۋدى جالعاستىرعان. الايدا كونتسەرت باستالاردان شامامەن ءبىر ساعات بۇرىن الماتىدا اۋا رايى كۇرت وزگەردى.
كۇندىزگى اپتاپ ىستىقتان كەيىن قالادا قاتتى جەل سوعىپ، نايزاعاي وينادى. ستاديون اۋماعىندا جەلدىڭ ەكپىنى بىرنەشە شاتىردى قۇلاتىپ اكەتتى. كەيىن ولار قايتا ورناتىلدى.
وسى جاعدايلاردان كەيىن كورەرمەندەرگە كونتسەرتتىڭ 15 تامىزعا اۋىستىرىلعانى حابارلاندى. ۇيىمداستىرۋشىلار شەشىمنىڭ باستى سەبەبى رەتىندە قاۋىپسىزدىك ماسەلەسىن اتادى.
قازىرگى تاڭدا الماتى اكىمدىگى كونتسەرتتىڭ كەيىنگە شەگەرىلۋىنە قاتىستى قوسىمشا تۇسىنىكتەمە بەرۋگە دايىندالىپ جاتىر.
