قىرعىزستاننىڭ جالال-اباد قالاسى ماڭىندا قىتاي-قىرعىزستان-وزبەكستان تەمىر جولىنىڭ قۇرىلىسى باستالدى. بۇل تۋرالى 4 مامىردا قىرعىزستان مينيسترلەر كابينەتىنىڭ ءباسپاسوز قىزمەتى ايتتى، دەپ حابارلايدى «ادىرنا» ءتىلشىسى.
ۇزىندىعى 523 شاقىرىم جەلىنى سالۋ جوباسىنا دايىندىق 2022 جىلى ءۇش ەل قىتايدىڭ قاشعار اۋدانىنان وزبەكستان شەكاراسىنا دەيىنگى باعىتتى كەلىسىپ، تەحنيكالىق-ەكونوميكالىق نەگىزدەمەسىن ازىرلەۋگە كەلىسكەن كەزدە باستالعان ەدى.
باستاپقى كەزەڭدە ديزەلدىك تارتقىشتى پايدالانۋ جوسپارلانۋدا، كەيىن جەلى ەلەكترلەندىرىلەدى.
قىتاي تاراپىنىڭ پىكىرىنشە، قىتاي-قىرعىزستان-وزبەكستان تەمىر جولى —وڭتۇستىك-شىعىس جانە باتىس ازيا، تاياۋ شىعىس، تۇركيا مەن ەۋروپالىق وداق نارىقتارىنا جول اشاتىن «بەلدەۋ جانە جول» (BRI) باستاماسىنىڭ ماڭىزدى جوباسى. ونىڭ بويىمەن تاسىمالداناتىن جۇكتىڭ جىلدىق كولەمى 15 ميلليون تونناعا جەتەدى دەپ كۇتىلۋدە.
بولاشاقتا تەمىرجول ماگيسترالى تاياۋ شىعىس، وڭتۇستىك ازيا مەن ەۋروپا ايماقتارىنا دەيىن ۇزارۋى مۇمكىن.
ەسكە سالايىق، جەلىنى سالۋ جانە قارجىلاندىرۋ شارتتارى تۋرالى كەلىسىمگە ءۇش ەلدىڭ وكىلۋ 2024 جىلعى 6 ماۋسىمدا بەيجىڭدە قول قويعان ەدى.
وسىلايشا 27 جىل بويى كەيىنگە شەگەرىلىپ كەلگەن تەمىرجول جوباسى شىن مانىندە جۇزەگە اسىرىلا باستادى.
