امازونكانىڭ باتپاعىنا قۇلاعان ۇشاقتان امان قالعان بەس ادام 36 ساعات بويى قولتىراۋىندار قورشاۋىندا قالعان، دەپ حابارلايدى "ادىرنا" ۇلتتىق پورتالى.
جەڭىل موتورلى ۇشاق اپاتقا ۇشىراعاننان كەيىن ءتىرى قالعان بەس ادام – ءبىر بالا، ءۇش ايەل جانە پيلوت – 36 ساعات بويى باتپاقتىڭ ورتاسىندا امان قالۋعا ءماجبۇر بولعان. ولار جان-جاعىنان جاقىنداپ كەلگەن ءىرى قولتىراۋىنداردىڭ قورشاۋىندا تۇرعان. پيلوت پابلو اندرەس ۆەلاردەنىڭ ايتۋىنشا، جىرتقىشتار ولارعا ءۇش مەترگە دەيىن جاقىنداعان، بىراق جاناسپاعان.
«قولتىراۋىندار كۇنى-ءتۇنى بىزدەن ءۇش-ءتورت مەتر قاشىقتىقتا بولدى، بىراق جاقىنداپ كەلمەدى. مەن تەلەفونىمداعى شام ارقىلى ولاردى باقىلاپ وتىردىم. مۇمكىن، سۋدىڭ بەتىنە جايىلعان جانارمايدىڭ ءيىسى ولاردى شوشىتقان بولار»، – دەيدى ول.
ۇشاق بوليۆيانىڭ سولتۇستىك-شىعىسىنداعى بەني دەپارتامەنتىندە باۋرەستەن ترينيدادقا قاراي باعىت العان. اپاتقا ۇشىراعان كەزدە ۇشاق باتپاققا قونعان، قاتتى سوققى سالدارىنان اۋدارىلىپ تۇسكەن. امان قالعاندار ۇشاقتىڭ توبەسىنە شىعىپ، كومەك كەلگەنشە سوندا تۇرعان.
پيلوتتىڭ ايتۋىنشا، ولار سۋ ىشپەي، تەك وزدەرىمەن بىرگە بولعان مانيوك ۇنىن عانا قورەك ەتكەن. سونىمەن قاتار، سۋدا جىلاندار كورىپ، ماسالارمەن كۇرەسۋگە تۋرا كەلگەن.
قۇتقارۋ جۇمىستارى بارىسىندا ولار بالىقشىلاردىڭ قايىعىن ەستىپ، تەلەفون شامىمەن بەلگى بەرىپ، كومەك شاقىرعان. كەيىننەن تىكۇشاقپەن قۇتقارىلىپ، اۋرۋحاناعا جەتكىزىلگەن.
بەني ءوڭىرىنىڭ دەنساۋلىق ساقتاۋ دەپارتامەنتىنىڭ ديرەكتورى رۋبەن توررەستىڭ ايتۋىنشا، ءىز-ءتۇزسىز جوعالعان ادامداردى تابۋ ءۇشىن كوپتەگەن مەكەمە جۇمىلعان.
