ۇستەل تەننيسىنەن وتكەن الەم چەمپيوناتىندا قازاق بالاسى تۇتاس الەم نازارىن وزىنە اۋداردى. ول تۋنيستە وتكەن دودادا دارا شاۋىپ، جۇپتىق سىندا التىن، جەكەلەي سىندا ەل قورجىنىنا قولا مەدال سالدى. بۇل جايدى "ادىرنا" ۇلتتىق پورتالى حابارلايدى.
سپورت جاڭالىقتارىنىڭ جارشىسىنا اينالعان جۋرناليست رۋسلان مەدەلبەك قازاق بالاسى الان قۇرمانعاليەۆتىڭ جەتىستىگىن سۇيىنشىلەپ، كوپشىلىكتى قۋانىشقا بولەدى. ەرەكشە وقيعا جايلى:
- ۇستەل تەننيسىنەن تۋنيستە ءوتىپ جاتقان جاسوسپىرىمدەر اراسىنداعى الەم چەمپيوناتىندا قازاق بالاسى الان قۇرمانعاليەۆ 15 جاسقا دەيىنگى سپورتشىلار اراسىندا جۇپتىق سىندا (ەگيپەتتىك حانا گوبامەن) التىن، جەكەلەي سىندا قولا مەدال جەڭىپ الدى. قىتاي، كارىس، جاپوندار مىقتى كەلەتىن سپورتتا قازاق بالاسىنىڭ مەدال الۋى - تاريحي جەڭىس. الان دەگەن ەسىمدى ەستە ساقتاڭىز، 2028 جىلعى وليمپيادانى شۋلاتار دەگەن ءۇمىتىمىز بار، - دەپ جازدى جۋرناليست.
الان قازىر ون جەتى جاستا. جاس ساڭلاق جىل بويىنا تۇراقتى ناتيجە كورسەتىپ، 19 حالىقارالىق ءتۋرنيردىڭ مەدالىن جەكە قورجىنىنا سالىپ ۇلگەردى. جاس باتىر ۇستەل تەننيسى بويىنشا قازاق ەلىنەن شىققان تۇڭعىش الەم چەمپيونى. الاننىڭ وليمپيادا چەمپيونى اتانارىنا دا قولداۋشىلارى ناق سەنىمدى.
"بۇل تاريح! ءبىزدىڭ جاس الان قۇرمانعاليەۆ الەم چەمپيونى اتاندى. ءبىزدىڭ ۇلكەن ۇستەل تەننيسى وتباسىمىز بۇل ناتيجەگە وتە قۋانىشتى جانە ونى سپورتشىنىڭ قاجىرلى ەڭبەگى مەن ءوز ىسىنە دەگەن سۇيىسپەنشىلىگىنىڭ ناتيجەسى رەتىندە باعالايدى!",- دەدى ۇستەل تەننيسى فەدەراتسياسىنىڭ پرەزيدەنتى دانيار ابىلعازين.
جەڭىستى كۇن، اجارلى ساعات، جۇلدىزدى ساتتەردە جولىققانشا، الان!
"ادىرنا" ۇلتتىق پورتالى
