شۆەيتساريالىق Sun-Ways ستارتاپى جۇمىس ىستەپ تۇرعان تەمىرجول ماگيسترالىنىڭ رەلستەرىنىڭ اراسىنا كۇن پانەلدەرىن ورناتىپ، تاجىريبەلىك كۇن ەلەكتر ستانتسياسىن ىسكە قوسۋدى ءساتتى جۇزەگە اسىردى، دەپ حابارلايدى "ادىرنا" ۇلتتىق پورتالى swissinfo سايتىنا سىلتەمە جاساپ.
كۇن پانەلدەرىن تۋرا تەمىرجول تابانىنا ورناتۋ ارقىلى ەلەكتر ەنەرگياسىن ءوندىرۋ كولەمىن ۇلعايتۋعا بولادى، بۇل ءۇشىن جەكە ستانتسيالار سالۋعا جەر ءبولۋدىڭ قاجەتى بولمايدى.
يدەيا رەتىندە رەلستەردىڭ اراسىنا كۇن پانەلدەرىن ورناتۋ بۇرىننان بار. الايدا بۇل ءتاسىلدى العاشقى بولىپ شۆەيتساريالىقتار جۇزەگە اسىردى. ولار پانەلدەردى جىلدام ورناتىپ، سونداي جىلدامدىقپەن قايتا الىپ تاستاۋ مۇمكىندىگىن قامتاماسىز ەتتى.
دەمونتاج جاساۋ – تەمىرجولدى تەكسەرۋ جانە جوندەۋ ءۇشىن قاجەت، سەبەبى بۇل پروتسەستەر بارلىق ەلدەردە قاتاڭ ەرەجەگە ساي جۇرگىزىلەدى. تەمىرجول ينفراقۇرىلىمى ستراتەگيالىق ماڭىزى بار سالا سانالادى، سوندىقتان وعان جوعارى قاۋىپسىزدىك تالاپتارى قويىلادى.
شۆەيتساريا بيلىگى Sun-Ways كومپانياسىنا باتىستاعى نەۆشاتەل كانتونىنا قاراستى شاعىن بۋتت (Buttes) اۋىلى ماڭىنداعى 100 مەترلىك جۇمىس ىستەپ تۇرعان تەمىرجول بولىگىن ەرەكشە پانەلدەرمەن جابدىقتاۋعا رۇقسات بەردى. بۇل ۋچاسكەدە پويىزدار 70 كم/ساع دەيىنگى جىلدامدىقپەن جۇرەدى. پانەلدەردى تەز ورناتىپ، تەز شەشىپ الۋ تەحنولوگياسى جاڭا بولعاندىقتان، بيلىك كومپانيا جوسپارلاعان التى ايلىق سىناق مەرزىمىن ءۇش جىلعا دەيىن ۇزارتۋدى تالاپ ەتتى. سونىمەن قاتار، پانەلدەردى قارقىندى قوزعالىس جۇرەتىن ماگيسترالداردا سىناۋعا تىيىم سالىندى.
رەلستەر اراسىنا پانەلدەردى ورناتۋ جانە شەشىپ الۋ ءۇشىن شۆەيتساريالىق Scheuchzer كومپانياسى ارنايى توسەۋ ماشيناسىن جاساپ شىعاردى. بۇل ماشينانىڭ كومەگىمەن 1000 م² كۇن پانەلدەرى بىرنەشە ساعات ىشىندە ورناتىلادى. ەگەر وسىنداي پانەلدەر شۆەيتساريانىڭ بارلىق تەمىرجول جەلىسىنە (شامامەن 5320 كم، تۋننەلدەر مەن كولەڭكەلى ۋچاسكەلەردى ەسەپتەمەگەندە) ورناتىلسا، جىلىنا 1000 گۆت·ساع ەنەرگيا ءوندىرىلىپ، بۇل ەلدىڭ جالپى قاجەتتىلىگىنىڭ 2%-ىن قامتاماسىز ەتە الادى.
پيلوتتىق جوبانى جۇزەگە اسىرۋعا بيلىك 700 مىڭ دوللاردان ءسال ارتىق قاراجات ءبولدى. ول جىلىنا 16 مىڭ كۆت·ساع ەلەكتر ەنەرگياسىن جەرگىلىكتى جەلىگە بەرۋگە مۇمكىندىك بەرەدى. جوباعا اقش، قىتاي، جاپونيا جانە وڭتۇستىك كورەيا وكىلدەرى قىزىعۋشىلىق تانىتتى. ءتىپتى وڭتۇستىك كورەيا بۇل تەحنولوگيامەن كەلەسى جىلى پيلوتتىق جوبانى ىسكە قوسپاق.
پانەلدەر لاستانىپ قالماس ءۇشىن ولاردى تازارتۋ ماقساتىندا ءار پويىزدىڭ سوڭعى ۆاگونىنا ارنايى ششەتكا-ۆاليك ورناتىلادى. بۇل پانەلدەردىڭ جۇمىسقا جارامدىلىعىن بارىنشا ساقتاۋعا مۇمكىندىك بەرەدى.
