اقمولا كولىك پروكۋراتۋراسى مەن استانا قالاسى بويىنشا ەكونوميكالىق تەرگەپ-تەكسەرۋ دەپارتامەنتى اقش-تان تۇرمىستىق تاۋارلار تۇرىندە ەسىرتكى زاتتارىن تاسىمالداۋشىنى اشكەرەلەدى، دەپ حابارلايدى "ادىرنا" ۇلتتىق پورتالى.
باس پروكۋراتۋرانىڭ مالىمەتىنشە، قۇقىق قورعاۋ ورگاندارى اقش-تان قازاقستان ازاماتشاسىنىڭ اتىنا ۇنەمى كۇماندى سالەمدەمەلەر كەلىپ تۇراتىنىن بايقاعان. زەرتتەۋ ناتيجەسىندە، ايەل تۇرمىستىق تاۋارلار تۇرىندە جاسىرىلعان ەسىرتكى زاتتارىن ەلگە تاسىمالداپ وتىرعانى انىقتالدى.
استاناداعى قازپوشتانىڭ كەدەندىك باقىلاۋ ايماعىندا وسىنداي سالەمدەمەلەردىڭ ءبىرى تاركىلەنىپ، ونىڭ ىشىنەن 1,2 كەلى گاشيش مايى تابىلدى. سونداي-اق، الماتى قالاسىنداعى ايەلدىڭ تۇرعىلىقتى جەرىن ءتىنتۋ كەزىندە 4,38 گرامم مەفەدرون تابىلدى.
استاناداعى سوت قازاقستان ازاماتشاسىن اسا ءىرى كولەمدە ەسىرتكى كونترابانداسى جانە ساتۋى بويىنشا كىنالى دەپ تانىپ، 16 جىلعا باس بوستاندىعىنان ايىردى.
ۇكىم ءالى زاڭدى كۇشىنە ەنگەن جوق.
