ءۇندىستان مەن پاكىستان اراسىنداعى قارىم-قاتىناستىڭ كۇرت شيەلەنىسۋىنە بايلانىستى ءۇندىستان پاكىستانعا قارسى الداعى 24–36 ساعاتتا اسكەري سوققى جاساۋى مۇمكىن. بۇل تۋرالى پاكىستاننىڭ اقپارات ءمينيسترى اتتاۋللا تارار مالىمدەدى، دەپ حابارلايدى "ادىرنا" ۇلتتىق پورتالى ريا نوۆوستي اگەنتتىگىنە سىلتەمە جاساپ.
تاراردىڭ ايتۋىنشا، ءۇندىستان پاحالگامدا بولعان تەراكتىنى سىلتاۋراتپاق. مينيستر X (بۇرىنعى Twitter) جەلىسىندە:
«پاكىستاندا ءۇندىستان الداعى 24–36 ساعات ىشىندە اسكەري سوققى جاساماقشى دەگەن سەنىمدى اقپارات بار»، — دەپ جازدى.
ول يسلاماباد تاراپىنان كەز كەلگەن اگرەسسياعا قاتال جاۋاپ بەرىلەتىنىن ەسكەرتتى.
سونىمەن قاتار، پاكىستان سەناتورى سەحار كامران ەكى ەل اراسىنداعى سۋ ماسەلەسىنىڭ ۋشىعۋى يادرولىق سوعىسقا دەيىن جەتۋى مۇمكىن ەكەنىن مالىمدەدى. ول يندا وزەنىنەن پاكىستانعا سۋ بەرۋدى توقتاتۋ — ەلدىڭ ومىرلىك ماڭىزى بار مۇددەلەرىنە تىكەلەي قاۋىپ توندىرەدى دەدى.
«ەكى ەل دە يادرولىق قارۋى بار قارسىلاستار بولعاندىقتان، بۇل قاقتىعىستاعى تاۋەكەلدەر وتە جوعارى. سۋ رەسۋرستارى بويىنشا جانجال يادرولىق سوعىسقا ۇلاسۋى مۇمكىن»، — دەدى كامران.
ونىڭ ايتۋىنشا، يندا وزەنى بويىنشا 1960 جىلى قابىلدانعان حالىقارالىق كەلىسىم ءتورت سوعىستى جانە بىرنەشە ديپلوماتيالىق داعدارىستى ەڭسەرگەن. بىراق ءۇندىستان تاراپىنان بۇل كەلىسىمدى توقتاتۋ نەمەسە بۇزۋ ارەكەتى حالىقارالىق قۇقىقتىڭ ورەسكەل بۇزىلۋى جانە پاكىستاننىڭ ومىرىنە تىكەلەي قاۋىپ رەتىندە قابىلدانادى.
كامران بۇل داعدارىس ايماقتاعى تۇراقتىلىق پەن بەيبىتشىلىككە تونگەن قاۋىپ ەكەنىن ايتىپ، ەكى ەلدى شۇعىل ديالوگقا شاقىردى.
ەستەرىڭىزگە سالا كەتەيىك، 22 ساۋىردە ءۇندىستاننىڭ دجاممۋ مەن كاشمير ايماعىندا پاحالگامدا تەررورلىق شابۋىل بولدى. قارۋلى ادامدار بايساران اڭعارىندا اتپەن سەرۋەندەپ جۇرگەن تۋريستەرگە وق جاۋدىردى. ناتيجەسىندە 25 ۇندىستاندىق جانە ءبىر نەپال ازاماتى قازا تاپتى. وسى تەراكتىدەن كەيىن ءۇندىستان پاكىستانعا قارسى بىرقاتار قاتاڭ شارالار قابىلدادى. اتاپ ايتقاندا، ەل بيلىگى پاكىستاندىق اسكەري اتتاشەلەردى ەلدەن شىعارىپ، 60 جىلدان استام ۋاقىت كۇشىندە بولعان يندا وزەنىنىڭ سۋ رەسۋرستارى بويىنشا ەكىجاقتى كەلىسىمدى توقتاتتى. سونىمەن قاتار، پاكىستانمەن اراداعى باستى شەكارالىق وتكەل – اتتاري بەكەتى دە بىردەن جابىلدى.
