ۇقك-ءنىڭ بۇرىنعى توراعاسى، ەكس-پرەمەر-مينيستر كارىم ءماسىموۆتىڭ استاناداعى ءزاۋلىم ءۇيى قالانىڭ الەۋمەتتىك قاجەتتىلىگىنە پايدالانۋعا بەرىلەدى. بۇل تۋرالى بۇگىن، 28 ساۋىردە «قايتارىلعان اكتيۆتەردى باسقارۋ كومپانياسى» ايتتى، دەپ حابارلايدى «ادىرنا» ءتىلشىسى.
رەسمي مالىمەتتەرگە سۇيەنسەك، قالا اكىمدىگى باسقارۋشى كومپانيانىڭ اتىنا رەسمي سۇرانىس جىبەرگەن.
«استانا قالاسى اكىمدىگىنەن اتالعان جىلجىمايتىن مۇلىكتى قالانىڭ الەۋمەتتىك قاجەتتىلىكتەرىن قاناعاتتاندىرۋ ماقساتىندا بەرۋ تۋرالى رەسمي سۇرانىس كەلىپ ءتۇستى. الەۋمەتتىك ماڭىزدىلىعىن جانە زاڭناما تالاپتارىن ەسكەرە وتىرىپ، بۇل نىسان ەلەكتروندىق ساۋدا جوسپارىنان الىندى»،—دەلىنگەن حابارلامادا.
كومپانيا نىساندى ءارى قاراي پايدالانۋ ماسەلەسى جەرگىلىكتى اتقارۋشى ورگاننىڭ مۇددەلەرىن ەسكەرە وتىرىپ، بەلگىلەنگەن تارتىپپەن شەشىلەتىنىن مالىمدەدى.
ەسكە سالايىق، ءماسىموۆتىڭ ءزاۋلىم ءۇيى ءۇش رەت ساۋداعا شىعارىلعان بولاتىن. نىساننىڭ باستاپقى باعاسى 1 685 115 000 تەڭگەنى قۇرادى.
