تالدىقورعاندا شەرزات پولاتتىڭ ءىسى بويىنشا سوت پروتسەسى بۇگىن تۇستەن كەيىن دە جالعاستى. بۇل جولى ءۇشىنشى كۋاگەر يۋلداش روزىباكيەۆ جاۋاپ بەرە باستادى، دەپ حابارلايدى، دەپ حابارلايدى «ادىرنا» ءتىلشىسى.
يۋلداش روزىباكيەۆ سوتتالۋشى ابزال مەن نۇرقياستى عانا تانيتىنىن، ال قالعان سوتتالۋشىلاردى تانىمايتىنىن جەتكىزدى.
«ءبىز سول كۇنى دوستارىمىزبەن تالعارداعى اكىمدىكتىڭ الدىندا تۇرعانبىز. كەيىن قازىكەنوۆ ارلانعا (كۋاگەردىڭ دوسى) حابارلاسىپ، اڭگىمەلەسىپ تۇردىق. ارتىنشا دانيار ەسىمدى دوسىمنىڭ اناسى حابارلاستى. اناسى تالعاردا توبەلەس بولىپ جاتقانىن ايتىپ، ءبىزدىڭ قايدا جۇرگەنىمىزدى سۇرادى. ورتالىقتا تۇرعانىمىزدى ايتتىق. وقيعا بولعان جەرگە ءۇش كولىكپەن باردىق. ءبىز كەلگەندە ەكى ادام جەردە جاتتى. كورشىلەرى مەن 20 شاقتى ادام ءجۇردى. ەكى ادام ارقاسىمەن جاتتى. ەكەۋى ءتىرى بولعان. ارتىنان Sonata كولىگى كەلىپ، سول ەكى ادامدى الىپ كەتتى. سول جەردە ايەل ادام قىزعىلت ءتۇستى باس كيىم مەن جاسىل ءتۇستى گيلزيانى الىپ كەتتى. ولار كولىككە وتىرىپ، كەتىپ قالدى. كەيىننەن پوليتسيا مەن جەدەل جاردەم كەلدى. كورشىلەرىنىڭ ايتۋىنشا، وقيعا ورنىندا مەرسەدەس كولىگى تۇرعان»،—دەيدى كۋاگەر.
ارتىنشا كۋاگەردىڭ دوسى ارلان سوتتالۋشى نۇرقياسقا حابارلاسۋدى ۇسىنعان.
«ارلاننىڭ كولىگىنە وتىرىپ، اۋىلعا قاراي كەتىپ، نۇرقياستى الىپ كەتۋ كەرەگىن ايتتى. كەلىپ ەدىك، 6-7 ادام ءجۇردى. ول جەردە گولف جانە قارا ءتۇستى مەرسەدەس كولىگى بولدى. كەلىپ امانداسا باستادىق. قاراڭعى بولدى. نۇرقياس: «كولىكتە كۇتىڭدەر»،— دەدى. بەس مينۋتتان كەيىن بىزگە كەلىپ «كەتتىك» دەدى. ءبىزدىڭ كولىككە ابزال شىناسىلوۆ پەن بەيتانىس قىز وتىردى. تومەن قاراي كەتتىك. مەرسەدەس كولىگى ءبىزدىڭ ارتىمىزدان كەلە جاتىپ، ءبىر كەزدە جوق بولىپ كەتتى. سوسىن نۇرقياس: «بۇرىلىپ، مەرسەدەستىڭ ىزىنە ءتۇس»،— دەدى. ابزال، نۇرقياس پەن بەيتانىس قىز كولىكتەن شىعىپ كەتىپ، راۆيل (سوتتالۋشىلاردىڭ ءبىرى) مەن تاعى ءبىر بەيتانىس ءبىزدىڭ كولىگىمىزگە وتىردى. ءبىز تومەن قاراي تۇستىك، مەرسەدەستىڭ ارتىنان كەلدىك، سول جەردە پوليتسەيلەر ءجۇردى»،—دەيدى كۋاگەر.
كۋاگەر كولىكتە سوتتالۋشىلار وتىرعان كەزدە اڭگىمەلەرىن تىڭداماعانىن ايتتى.
«سوتتالۋشىلاردىڭ ىسكە قاتىسى بارىن بىلمەدىم. كولىكتە وتىرعان كەزىمىزدە شىناسىل ابزال: “ەشتەڭە ايتپاڭدار”،—دەدى»،— دەيدى روزىباكيەۆ.
