يراننىڭ وڭتۇستىگىندەگى شاحيد-رادجاي پورتىندا بولعان جارىلىسقا زىمىران وتىنىنىڭ قاتىسى جوق. بۇل تۋرالى 27 ساۋىردە ەلدىڭ قورعانىس مينيسترلىگى ايتتى، دەپ حابارلايدى «ادىرنا» ءتىلشىسى DW اگەنتتىگىنە سىلتەمە جاساپ.
«يران بيلىگى ەلدىڭ ەڭ ءىرى ساۋدا پورتىنداعى جارىلىس حيميالىق زاتتاردى ابايسىز قولدانۋ سالدارىنان بولعانىن، ونىڭ زىمىران وتىنىنا ەش قاتىسى جوق ەكەنىن ايتتى»،—دەپ جازدى شەتەلدىك باق.
ال قورعانىس مينيسترلىگى ءوز مالىمدەمەسىندە شاحيد-رادجاي پورتىندا ەشقانداي اسكەري جۇك بولماعانىن باسا ايتىپ، جارىلىستىڭ ناقتى سەبەبى ءالى انىقتالماعانىن مالىمدەدى.
جەرگىلىكتى بيلىكتىڭ مالىمەتىنشە، ءورت سوندىرۋشىلەر ءورتتىڭ شامامەن 90 پايىزىن سوندىرگەن. قازىرگى تاڭدا جاعداي ءجىتى باقىلاۋدا.
سوڭعى مالىمەتتەرگە سۇيەنسەك، جويقىن جارىلىس سالدارىنان كەمىندە 40 ادام قازا تاۋىپ، 1200 ادام جاراقات العان.
ايتا كەتەيىك، يران ۇكىمەتى شاحيد-رادجاي پورتىنداعى جارىلىستان قازا تاپقانداردىڭ قۇرمەتىنە 28 ءساۋىردى ۇلتتىق ازا تۇتۋ كۇنى دەپ جاريالاعان ەدى.
