قازاقستان ءوز كريپتوبانكىن قۇرۋى مۇمكىن. بۇل تۋرالى پرەمەر-مينيستر ولجاس بەكتەنوۆ دەپۋتاتتىق ساۋالعا بەرگەن جاۋابىندا مالىمدەدى، دەپ حابارلايدى «ادىرنا» ءتىلشىسى.
ايتۋىنشا، كريپتوبانكتەر تۇراقتى تسيفرلىق ەكوجۇيەنى قالىپتاستىرۋدا ماڭىزدى ءرول اتقارا الادى.
«ۇكىمەت جاھاندىق ەكونوميكانىڭ اجىراماس بولىگىنە اينالىپ بارا جاتقان تسيفرلىق اكتيۆتەر سالاسىنداعى ۇردىستەردى مۇقيات قاداعالاپ وتىر. وسىعان بايلانىستى ەلدەگى تسيفرلىق اكتيۆتەردىڭ زاڭدى جانە اشىق نارىعىن دامىتۋعا ىقپال ەتەتىن تەڭگەرىمدى جانە پروگرەسسيۆتى رەتتەۋشى ورتانى قالىپتاستىرۋ جۇمىستارىن جالعاستىرىپ جاتىرمىز. ينفراقۇرىلىم دامىپ، قۇقىقتىق تاجىريبە جينالعان سوڭ كريپتوبانكتەردى قارجىلىق رەتتەۋ جۇيەسىنە ينستيتۋتسيونالدىق تۇردە ەنگىزۋ مۇمكىندىگى قاراستىرىلادى»»،—دەدى ول.
بۇعان دەيىن ءماجىلىس دەپۋتاتى ازات پەرۋاشەۆ قازاقستاندا كريپتوبانك اشۋ يدەياسىن ۇسىنعان ەدى.
