مەملەكەت باسشىسى قاسىم-جومارت توقاەۆ پەن رەسەي باسشىسى ۆلاديمير پۋتين كەلىسسوزدەر قورىتىندىسى بويىنشا ەكى ەلدىڭ مەملەكەتارالىق قارىم-قاتىناسىن جان-جاقتى ستراتەگيالىق سەرىكتەستىك جانە وداقتاستىق دەڭگەيىنە دەيىن جەتكىزۋ جونىندەگى دەكلاراتسياعا قول قويدى، دەپ حابارلايدى «ادىرنا» ءتىلشىسى.
قاسىم-جومارت توقاەۆ بۇل قۇجاتتىڭ تاريحي ءمانى زور ەكەنىن اتاپ ءوتتى.
«حالىقتارىمىز اراسىنداعى مىزعىماس ءوزارا سەنىم مەن ىنتىماقتاستىقتىڭ كەلەشەگى كەمەل ەكەنىن كورسەتەدى. وسى ورايدا ەكىجاقتى بايلانىستى نىعايتۋعا ەلەۋلى ۇلەس قوسقانى ءۇشىن ۆلاديمير ۆلاديميروۆيچ پۋتينگە شىنايى ريزاشىلىعىمدى بىلدىرەمىن»،-دەدى ول.
مەملەكەت باسشىسى كەلىسسوزدەردىڭ ناتيجەسىن جوعارى باعالادى.
«قازاقستاندىقتار رەسەي پرەزيدەنتىن جاھاندىق اۋقىمداعى مەملەكەت قايراتكەرى دەپ بىلەدى ءارى قۇرمەتتەيدى. ونىڭ ەسىمى الەمگە جاقسى ءمالىم جانە قازىرگى الماعايىپ زاماندا ورىس حالقى مەن رەسەي مەملەكەتىنىڭ مۇددەسىن قورعاۋ ىسىندە سەنىم مەن قاجىماس قايراتتىڭ سيمۆولى رەتىندە قابىلدانادى.
قازاقستان رەسەي فەدەراتسياسىنىڭ وركەندەۋىنە شىن مانىندە مۇددەلى. بۇگىنگى كەلىسسوزدەر ناتيجەسىن جوعارى باعالايمىن. كەزدەسۋىمىز اشىق ءارى سەنىمدى راۋىشتە ءوتتى جانە ناقتى پايداسىن بەردى»،–دەدى توقاەۆ.
