باس پروكۋراتۋرا جامبىل وبلىسىنداعى ەكس-پروكۋروردىڭ مالىمدەمەسىنەن كەيىن تەكسەرىس جۇرگىزىلەتىنىن مالىمدەدى، دەپ حابارلايدى “ادىرنا” ۇلتتىق پورتالى.
“قۇزىرلى ورگان جامبىل وبلىسى بويىنشا قۇقىقتىق ستاتيستيكا جانە ارنايى ەسەپكە الۋ كوميتەتى دەپارتامەنتى قىزمەتكەرىنىڭ بۇقارالىق اقپارات قۇرالدارى مەن الەۋمەتتىك جەلىلەردە تارالعان بەينەجولداۋ جونىندە مىناداي اقپارات تاراتتى.
باس پروكۋروردىڭ تاپسىرماسى بويىنشا ايتىلعان ۋاجدەردى تەكسەرۋ ءۇشىن جامبىل وبلىسىنا باس پروكۋراتۋرانىڭ ىشكى قاۋىپسىزدىك دەپارتامەنتى مەن ءتيىستى قۇرىلىمدىق بولىمشەسىنىڭ قىزمەتكەرلەرى، سونداي-اق كوميتەت توراعاسىنىڭ ورىنباسارى كىرەتىن جۇمىس توبى جىبەرىلد”ى، – دەلىنگەن حابارلامادا.
ايتا كەتسەك، الەۋمەتتىك جەلى ارقىلى بۇعان دەيىن باس پروكۋراتۋرانىڭ قۇقىقتىق ستاتيستيكا جانە ارنايى ەسەپكە الۋ جونىندەگى كوميتەتى دەپارتامەنتىنىڭ قىزمەتكەرى ادىلدىك ورناتۋدى سۇراپ، ۆيدەوۇندەۋ جولداعان ەدى.
“مەن، ءاليا قوجابەكوۆا جامبىل وبلىسى بويىنشا كوميتەت دەپارتامەنتىنىڭ قىزمەتكەرىمىن. بۇل قۇرىلىمدا بىرىڭعاي تەرگەۋ تىزىلىمىنەن دەرەكتەردى جويۋ – ۇيرەنشىكتى جاعدايعا اينالعان. بۇل ءۇشىن كىنالىلەر جاۋاپقا تارتىلمايدى نەمەسە تەك كوزبوياۋشىلىق ءۇشىن عانا جازالانادى. ال مەن سەكىلدى جازىقسىزدار قۇقىق قورعاۋ جۇيەسىنىڭ قۇربانىنا اينالادى”، – دەدى ول.
ءاليا قوجابەكوۆانىڭ ايتۋىنشا، 2013 جىلى دەمالىستا جۇرگەن كەزىندە دەپارتامەنتتىڭ كەي قىزمەتكەرلەرى قىلمىستىق جاۋاپكەرشىلىككە تارتىلعان ازاماتتار تۋرالى مالىمەتتەردى بازا جۇيەسىنەن ءوشىرىپ تاستاعان. ماقسات – سوتتىلىق دەرەكتەرىن جاسىرۋ بولعان. ول جۇمىسىنا قايتا ورالعاندا تەكسەرىس باستالىپ، بار كىنا قوجابەكوۆاعا ارتىلعان. سونىڭ سالدارىنان ول ءبولىم باسشىسى قىزمەتىنەن بوساتىلعان. سودان بەرى وعان قالىپتى جۇمىس ىستەۋگە مۇمكىندىك بەرمەي، بالالارىمەن بىرگە وزگە اۋداندارعا قايتا-قايتا جىبەرىپ وتىرعان.
11 جىلدان سوڭ قوجابەكوۆا دەپارتامەنتكە قايتا ورالىپ، قىلمىستىق-قۇقىقتىق ستاتيستيكا بولىمىنە جۇمىسقا ورنالاسادى. سول جەردە دە بتت بازاسىنان دەرەكتەردى بىرنەشە مارتە جويۋ جانە وزگەرتۋ فاكتىلەرىن انىقتاعان. بۇل تۋرالى باسشى اتىنا راپورت جازعانىمەن، ونىڭ ايتۋىنشا، بارلىق كىنالىلەر جاۋاپقا تارتىلماعان، ال قىلمىستىق ءىس مۇلدە قوزعالماعان. قازىر قوجابەكوۆانىڭ وزىنە قىسىم جاسالىپ، تاعى دا جۇمىس ىستەۋگە كەدەرگى كەلتىرىلىپ وتىر. ول قىزمەتىنەن بوساتىلعان. قوجابەكوۆا ءتيىستى شارا قابىلداۋدى، ادىلدىكتى قالپىنا كەلتىرۋدى، بۇرىنعى بارلىق وتىنىشتەرىن قايتا كوتەرىپ، تەكسەرىستى قۇزىرەتتى تۇلعالار جۇرگىزۋىن سۇراپ وتىر.
