Bas prokuratura Jambyl oblysyndaǧy eks-prokurordyŋ mälımdemesınen keiın tekserıs jürgızıletının mälımdedı, dep habarlaidy “Adyrna” ūlttyq portaly.
“Qūzyrly organ Jambyl oblysy boiynşa qūqyqtyq statistika jäne arnaiy esepke alu komitetı departamentı qyzmetkerınıŋ būqaralyq aqparat qūraldary men äleumettık jelılerde taralǧan beinejoldau jönınde mynadai aqparat taratty.
Bas prokurordyŋ tapsyrmasy boiynşa aitylǧan uäjderdı tekseru üşın Jambyl oblysyna Bas prokuraturanyŋ ışkı qauıpsızdık departamentı men tiıstı qūrylymdyq bölımşesınıŋ qyzmetkerlerı, sondai-aq komitet töraǧasynyŋ orynbasary kıretın jūmys toby jıberıld”ı, – delıngen habarlamada.
Aita ketsek, äleumettık jelı arqyly būǧan deiın Bas prokuraturanyŋ qūqyqtyq statistika jäne arnaiy esepke alu jönındegı komitetı departamentınıŋ qyzmetkerı ädıldık ornatudy sūrap, videoündeu joldaǧan edı.
“Men, Äliia Qojabekova Jambyl oblysy boiynşa komitet departamentınıŋ qyzmetkerımın. Būl qūrylymda bıryŋǧai tergeu tızılımınen derekterdı joiu – üirenşıktı jaǧdaiǧa ainalǧan. Būl üşın kınälıler jauapqa tartylmaidy nemese tek közboiauşylyq üşın ǧana jazalanady. Al men sekıldı jazyqsyzdar qūqyq qorǧau jüiesınıŋ qūrbanyna ainalady”, – dedı ol.
Äliia Qojabekovanyŋ aituynşa, 2013 jyly demalysta jürgen kezınde departamenttıŋ kei qyzmetkerlerı qylmystyq jauapkerşılıkke tartylǧan azamattar turaly mälımetterdı baza jüiesınen öşırıp tastaǧan. Maqsat – sottylyq derekterın jasyru bolǧan. Ol jūmysyna qaita oralǧanda tekserıs bastalyp, bar kınä Qojabekovaǧa artylǧan. Sonyŋ saldarynan ol bölım basşysy qyzmetınen bosatylǧan. Sodan berı oǧan qalypty jūmys ısteuge mümkındık bermei, balalarymen bırge özge audandarǧa qaita-qaita jıberıp otyrǧan.
11 jyldan soŋ Qojabekova departamentke qaita oralyp, qylmystyq-qūqyqtyq statistika bölımıne jūmysqa ornalasady. Sol jerde de BTT bazasynan derekterdı bırneşe märte joiu jäne özgertu faktılerın anyqtaǧan. Būl turaly basşy atyna raport jazǧanymen, onyŋ aituynşa, barlyq kınälıler jauapqa tartylmaǧan, al qylmystyq ıs mülde qozǧalmaǧan. Qazır Qojabekovanyŋ özıne qysym jasalyp, taǧy da jūmys ısteuge kedergı keltırılıp otyr. Ol qyzmetınen bosatylǧan. Qojabekova tiıstı şara qabyldaudy, ädıldıktı qalpyna keltırudı, būrynǧy barlyq ötınışterın qaita köterıp, tekserıstı qūzyrettı tūlǧalar jürgızuın sūrap otyr.
