قازاقستان پرەزيدەنتى قاسىم-جومارت توقاەۆ «قازاقستان رەسپۋبليكاسىنىڭ كەيبىر زاڭنامالىق اكتىلەرىنە دەنساۋلىق ساقتاۋ، ويىن بيزنەسى جانە ارتىق زاڭنامالىق رەگلامەنتتەۋدى بولعىزباۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» قازاقستان رەسپۋبليكاسىنىڭ زاڭىنا قول قويدى. بۇل تۋرالى اقوردا جازدى، دەپ حابارلايدى “ادىرنا”.
اقپاراتقا سايكەس، وسى زاڭ ارقىلى «حالىق دەنساۋلىعى جانە دەنساۋلىق ساقتاۋ جۇيەسى تۋرالى» كودەكسكە، «جارناما تۋرالى»، «ويىن بيزنەسى تۋرالى»، «مىندەتتى الەۋمەتتىك مەديتسينالىق ساقتاندىرۋ تۋرالى» زاڭدارعا تۇزەتۋلەر ەنەدى.
تۇزەتۋلەردىڭ ءبىرىنشى بلوگى دەنساۋلىق ساقتاۋ سالاسىنداعى جەكەلەگەن ماسەلەلەردى شەشۋگە باعىتتالعان. دالىرەك ايتساق، ەندى ونكولوگيالىق اۋرۋلاردى ەرتە انىقتاۋعا ارنالعان سكرينينگتىك زەرتتەۋلەر كەزىندە امبۋلاتوريالىق جاعدايدا بەرىلەتىن مامانداندىرىلعان مەديتسينالىق كومەك اياسىنداعى زەرتتەۋلەر مىندەتتى الەۋمەتتىك مەديتسينالىق ساقتاندىرۋ جۇيەسىنەن الىنىپ، مەملەكەت كەپىلدىك بەرەتىن مەديتسينالىق كومەكتىڭ تەگىن كولەمىنە ەنەدى.
«ەكىنشى بلوكتا بۋكمەكەرلىك كەڭسەلەر مەن توتاليزاتورلاردى ۇيالى بايلانىستىڭ ابونەنتتىك قۇرىلعىلارى، سونداي-اق ونلاين-پلاتفورمالار ارقىلى جارنامالاۋعا تىيىم سالىنعان. سونىمەن قاتار بۋكمەكەرلىك كەڭسەلەر مەن توتاليزاتورلاردى جارنامالاۋ رۇقسات ەتىلگەن بۇقارالىق اقپارات قۇرالدارىنىڭ شەڭبەرى تارىلدى، ولار ەندى تەك سپورتتىق باعىتتا بولۋى كەرەك. «ويىن بيزنەسى تۋرالى» زاڭدا باس بوستاندىعىن شەكتەۋ تۇرىندەگى جازا بويىنشا سوتتالعان نەمەسە شارتتى تۇردە سوتتالعان ادامداردىڭ قۇمار ويىندارعا جانە (نەمەسە) ءباس تىگۋگە قاتىسۋىنا تىيىم سالۋ بەلگىلەنگەن»، - دەپ حابارلايدى اقوردا.
ۇقساس جاڭالىقتار
