پرەزيدەنت قاسىم-جومارت توقاەۆ حح عاسىرداعى ساياسي قۋعىن-سۇرگىن ماتەريالدارىن زەرتتەۋ ورتالىعىنىڭ جۇمىسىمەن تانىستى. بۇل تۋرالى اقوردانىڭ ءباسپاسوز قىزمەتى مالىمدەدى، دەپ حابارلايدى “ادىرنا” ۇلتتىق پورتالى
مەملەكەت باسشىسى ورتالىقتا قۇجاتتاردى ساقتاۋ شارتىمەن، مۇراعات قۇجاتتارىن قالپىنا كەلتىرۋ جانە ميكروفيلمدەۋ كابينەتتەرىنىڭ جۇمىسىمەن تانىستى. سونىمەن قاتار مەملەكەت باسشىسىنا وتكەن عاسىرداعى ساياسي قۋعىن-سۇرگىن تاريحىنا قاتىستى ماتەريالدار بويىنشا جۇرگىزىلگەن جۇمىستاردىڭ ەكسپوزيتسياسى كورسەتىلدى.
پرەزيدەنتتىڭ جارلىعىمەن 2020 جىلدىڭ قاراشا ايىندا حح عاسىرداعى ساياسي قۋعىن-سۇرگىن قۇرباندارىن تولىق اقتاۋ جونىندە مەملەكەتتىك كوميسسيا قۇرىلدى. مەملەكەتتىك كوميسسيانىڭ جۇمىسىنا قولداۋ كورسەتۋ ماقساتىندا 2021 جىلى حح عاسىرداعى ساياسي قۋعىن-سۇرگىن ماتەريالدارىن زەرتتەۋ ورتالىعى اشىلدى. حح عاسىردىڭ 30-50 جىلدارىنداعى ساياسي قۋعىن-سۇرگىن تاريحىنا قاتىستى ماتەريالدار ورتالىققا ءىىم، ۇقك، باس پروكۋراتۋرانىڭ ارناۋلى مۇراعاتتارىنان بەرىلەدى. ورتالىق تاياۋ ۋاقىتتا بارلىعى 715 مىڭعا جۋىق ءىستى قابىلداپ الادى دەپ جوسپارلانىپ وتىر. مۇندا قۇجاتتاردى قۇپياسىزداندىرۋ، قالپىنا كەلتىرۋ جۇمىستارى جۇزەگە اسىرىلادى. ولاردى زەرتتەۋ جانە عىلىمي اينالىمعا ەنگىزۋ ءۇشىن ءتيىستى جاعداي جاسالعان، دەلىنگەن حابارلامادا.
قازىرگى ۋاقىتتا تاريحشى-عالىمدار مەن ورتالىق قىزمەتكەرلەرى «الاشوردا ءىسى. 1920-1940 جج. قۇجاتتار مەن ماتەريالدار» اتتى كوپتومدىقتى باسپاعا دايىنداپ جاتىر. بۇل باسىلىم حح عاسىرداعى قازاقستاننىڭ ساياسي تاريحىنىڭ عىلىمي كوكجيەگىن كەڭەيتەدى. ورتالىقتىڭ قورىندا 1 ميلليون 132 مىڭ ءىس ساقتالعان. مەملەكەت باسشىسى تاريحىمىزدى زەردەلەۋ ىسىندە ورتالىقتىڭ جۇمىسى ماڭىزدى ەكەنىن اتاپ ءوتىپ، ۇجىمعا ساتتىلىك تىلەدى.
