پروكۋرور ءماجىلىستىڭ بۇرىنعى دەپۋتاتى نۇرجان التاەۆتى 12 جىلعا سوتتاۋدى سۇرادى. بۇل تۋرالى تىركەلمەگەن «ەل تىرەگى» پارتياسىنىڭ جەتەكشىسى، زاڭگەر گۇلشات دۇيسەنوۆا ايتتى، دەپ حابارلايدى “ادىرنا” ۇلتتىق پورتالى.
ەكس-دەپۋتات “اسا ءىرى كولەمدە پارا الۋ” بابى بويىنشا كۇدىككە ىلىنگەن. ول وزىنە تاعىلعان ايىپتاردى مويىندامادى. ادۆوكاتى مۇنى “ساياسي تاپسىرىس” دەپ اتاپ، قۇقىق قورعاۋشىلار ءالتاەۆتى “ساياسي تۇتقىندار” قاتارىنا قوستى. ال ءىس بويىنشا سوت وتىرىستارى جابىق ءوتىپ جاتىر.
سىبايلاس جەمقورلىققا قارسى ءىس-قيمىل اگەنتتىگىنىڭ حابارلاۋىنشا، نۇرجان التاەۆ 2018-2020 جىلدارى ەڭبەك جانە حالىقتى الەۋمەتتىك قورعاۋ ۆيتسە-ءمينيسترى جانە ءماجىلىس دەپۋتاتى بولعان كەزىندە 50 ميلليون تەڭگەگە جۋىق پارا العان.
