Búgin, 23 sáýir — elimizde alǵash ret Ulttyq kitap kúni toılandy.
Bul mereke 2024 jylǵy 29 maýsymda Úkimettiń qaýlysymen resmı túrde bekitilip, bıyl alǵash ret keń aýqymda atalyp ótti. Merekeniń maqsaty — kitap oqýǵa qyzyǵýshylyqty arttyryp, ásirese jastar arasynda oqý mádenıetin nasıhattaý.
Prezıdent Qasym-Jomart Toqaev byltyr ótken úshinshi Ulttyq quryltaıda erekshe usynysyn málimdegen edi.
“Biz, eń aldymen, jastardy kitap oqýǵa baýlýymyz kerek. Sonda, jappaı kitap oqıtyn ultqa aınalamyz,” — dep atap ótken.
Sol ıgi bastamanyń nátıjesi retinde elordada ótken saltanatty jıynda jyldyń úzdik kitap jobalary men baspalary marapattaldy. Is-sharaǵa QR Parlamenti Májilisiniń tóraǵasy Erlan Qoshanov, QR Mádenıet jáne aqparat mınıstri Aıda Balaeva, QR Kitap palatasynyń dırektory Ádil Qoıtanov, sonymen qatar baspagerler, májilis depýtattary men zııaly qaýym ókilderi qatysty.
33 jyldyq tarıhy bar «Atamura» baspasy bul joly da bıikten kórindi. Kóp jylǵy eńbektiń, úzdiksiz izdenistiń nátıjesinde «Atamura» «Jyldyń úzdik baspasy» atalymyn jeńip alyp, 2 mıllıon teńge kólemindegi syıaqyǵa ıe boldy. Marapatty QR Kitap palatasynyń dırektory Ádil Qajenbaıuly Qoıtanov tabys etti.
Aıta keteıik, bul jetistik — «Atamura» korporaııasynyń sapaly ádebıetter men oqýlyqtardy usynýdaǵy uzaq jylǵy kásibı eńbeginiń jemisi. Tek bıyldyń ózinde baspa birneshe jańa kitap shyǵaryp, avtorlardy qoldaýǵa úlken úles qosty.
«Atamura» korporaııasynyń prezıdenti Raqymǵalı Qul-Muhammed Ulttyq kitap kúni aıasynda taǵy bir qýanyshty jańalyqpen bólisti. Ol “Atamura” baspasynyń atynan elimizdiń barlyq kitaphanalaryna qazaq klassıkteriniń úzdik 1000 týyndysyn tegin syıǵa tartatynyn habarlady.
