اقش كوروناۆيرۋس زەرتحانادان تارادى دەگەن جورامالىن قايتا كوتەرىپ، قىتايدى دالەلسىز ايىپتاۋ ارقىلى COVID-19-دىڭ تارالۋىن ساياسي قۇرالعا اينالدىرۋىن جالعاستىرىپ وتىر، دەپ حابارلايدى "ادىرنا" ۇلتتىق پورتالى.
بۇل تۋرالى قىتايدىڭ سىرتقى ىستەر مينيسترلىگىنىڭ رەسمي وكىلى مالىمدەدى.
وتكەن دەمالىس كۇندەرى اق ءۇي COVID-19 ىندەتىنىڭ شىعۋ تەگى تۋرالى اقپارات بەرۋگە ارنالعان جاڭا ۆەب-سايتتى تانىستىردى. وندا ىندەتتىڭ قىتايداعى زەرتحانادان تاراعانى ايتىلعان.
سەيسەنبى كۇنى وتكەن ءباسپاسوز ءماسليحاتىندا قىتاي ءسىم وكىلى گو تسزياكۋن ۆيرۋستىڭ شىعۋ تەگىن زەرتتەۋ – ماڭىزدى عىلىمي ماسەلە ەكەنىن ايتتى. ول قىتاي بۇل باعىتتاعى جاھاندىق عىلىمي زەرتتەۋلەرگە بەلسەندى تۇردە قاتىسىپ، ارقاشان عىلىمي جانە اشىقتىق ءپرينتسيپىن ۇستاناتىنىن اتاپ ءوتتى.
گو تسزياكۋن اقش-تى بۇل ماسەلەنى ساياسيلاندىرۋدى، ونى قۇرال مەن قارۋ رەتىندە قولدانۋدى دوعارۋعا، باسقا ەلدەردى ورىنسىز ايىپتاۋدى توقتاتۋعا جانە پاندەمياعا بايلانىستى وزىنە قاتىستى تۋىنداعان كۇماندەرگە ءۇنسىز قالماۋعا شاقىردى.
«اقش حالىقارالىق قاۋىمداستىقتىڭ ادىلەتتى الاڭداۋشىلىعىنا جاۋاپ بەرىپ، الەم حالىقتارىنا ناقتى تۇسىنىكتەمە بەرۋى ءتيىس»، – دەدى گو تسزياكۋن.
ول پاندەميا باستالعالى الەمنىڭ ءتۇرلى ەلدەرىندە ۆيرۋستىڭ شىعۋ تەگى تۋرالى ءتۇرلى بولجامدار ايتىلعانىن، ولاردىڭ قاتارىندا اقش-تىڭ دا بار ەكەنىن ەسكە سالدى. بۇل ەلدە ءبىر كەزدەرى ۆەيپ اۋرۋىنىڭ تارالۋى جانە فورت-دەتريك بيوزەرتحاناسىنا قاتىستى جاعداي ەرەكشە نازار اۋدارتقان.
«حالىقارالىق قاۋىمداستىق اقش-تان ناقتى جانە اشىق تۇسىنىكتەمە الۋ كەرەك»، – دەدى قىتاي ءسىم رەسمي وكىلى.
