مادەنيەت جانە اقپارات ءمينيسترى ايدا بالاەۆا ۇكىمەت وتىرىسىنان كەيىن وتكەن ءباسپاسوز ءماسليحاتىندا «قازاقفيلم» مەن «قازاقانيماتسيا» مەكەمەلەرىنە قاتىستى سىندار مەن پىكىرتالاسقا جاۋاپ بەردى، دەپ حابارلايدى "ادىرنا" ۇلتتىق پورتالى.
ءمينيستردىڭ ايتۋىنشا، اتالمىش مەكەمەلەرگە باسشىلىققا ەڭ الدىمەن كاسىبي مەنەدجەر كەرەك. ول رەجيسسەر نەمەسە اكتەر ەمەس، ناقتى باسقارۋشىلىق قابىلەتى بار مامان بولۋى ءتيىس.
«ازامات ساتىبالدى كەتكەننەن كەيىن مەن «قازاقفيلمنىڭ» مەنەدجمەنتىن باقىلاۋعا الىپ، كۇندەلىكتى جۇمىسىن قاداعالاپ وتىرمىن. قازىر مەكەمە قارجىلىق جاعىنان وڭ كورسەتكىشكە جەتتى، بۇل – دامۋ بار دەگەن ءسوز»، – دەدى ايدا بالاەۆا.
سونداي-اق ول «قازاقفيلم» باسشىسى قازاق ءتىلىن بىلمەيدى دەگەن سىنعا قاتىستى ءوز پىكىرىن ءبىلدىرىپ، ناتيجە كورسەتىپ وتىرعان مامانعا ءتىل ماسەلەسى بويىنشا شابۋىل جاساۋدى ورىنسىز دەپ اتادى.
مينيستر كينو ماماندارى تاراپىنان ايتىلىپ جاتقان سىندارعا قاتىستى جەكە كەزدەسۋ وتكىزۋ تۋرالى ۇسىنىسقا دا توقتالىپ ءوتتى. «بۇل – بىتپەيتىن داۋ. اركىمنىڭ ءوز شىندىعى بار. سول سەبەپتى داۋلاسقاننان گورى ناقتى جۇمىس ىستەگەن دۇرىس»، – دەدى ول.
ايدا بالاەۆا بارشا جۇرتتى «قازاقفيلمنىڭ» قازىرگى جۇمىسى جانە جەتىستىكتەرىمەن تانىسۋعا شاقىردى.
